وتەبێژى ئەنجومەنی باڵای ئیسلامی یەكێك لە هێزەكانی ناو چوارچێوەی هەماهەنگی بەمیدیا عێراقییەكانی ڕاگەیاند، بەم نزیكانە شاندێكی عێراق سەردانی ویلایەتە یەكگرتووەكانی ئەمەریكا دەكات بەمەبەستی تاوتوێكردنی بەرزی نرخی دۆلار بەرامبەر دینار.
عەلی دافی، وتەبێژی ئەنجوومەنی باڵای ئیسلامی بە میدیا عێراقییەكانی ڕاگەیاند، لە چەند ڕۆژی داهاتوودا شاندێكی وەزارەتی دارایی عێراق و بانكی ناوەندی عێراق سەردانی ویلایەتە یەكگرتووەكانی ئەمریكا دەكەن.
ئاماژەی بەوەشكرد، ئامانجى سەردانەکەى شاندى عێراق بۆ ئەمریکا بە مەبەستى تاوتوێکردنى بەرزى نرخى دۆلارە بەرامبەر دینارى عێراقى .
عەلی دافی دەشڵێت، ئێمە پشتگیری لە بەرەنگاربوونەوەی گەندەڵی و كۆتاییهێنان بە سپیكردنەوەی پارە و قاچاخچێتی دراو دەكەین، بەڵام دەبێت كاتێكی گونجاو هەبێت، بۆ ئەوەی حكومەتی عێراق بتوانێت بەدواداچوون بكات و ئەم ڕێوشوێنانە جێبەجێ بكات.
ئەوەش لەکاتێکدایە، دوێنێ ئەلینا ڕۆمانۆڤسكی باڵیۆزی ئەمریكا لە عێراق چاوپێكەوتنێكی تەلەفزیۆنیدا ڕایگەیاند، واشنتن لایەنێک نیە لە بەرزبونەوەى نرخى دۆلار بەرامبەر دینار و چیتریش سزا بەسەر بانکە نوێ ئەهلیەکاندا ناسەپێنین.
هـ.ئ
