ڕاگەیاندنی شانەی ئەمنی عێراق ئیدانەی هێرشەكانی شەوی ڕابردووی دەوڵەتی توركی كرد بۆسەر كامپی مەخمور و شارۆچكەی شەنگال و ڕایگەیاند، هەموو پێشێلكارییەك ڕەتدەكەینەوە.
لە كاتژمێری ١٠ی شەوی ڕابردووەوە تا كاتژمێری ٣ی بەرەبەیانی ئەمڕۆ، دەوڵەتی تورك بە بەدەوامیی و لە ماوەی ئەو پێنج كاتژمێرە بۆردوومانێكی سەختی كامپی مەخمور و شارۆچكەی شەنگال و شاری دێركی ڕۆژئاوای كوردستانی كرد.
لەسەر ئەو هێرشە ئاسمانییە، ڕاگەیاندنی شانەی ئەمنی عێراق ڕاگەیەندراوێكی بلاوكردەوە و تێیدا هاتووە: ئێمە ئیدانەی ئەو کارە دەکەین، هێزە ئەمنییەکانمان هەر پێشێلکارییەک لەلایەن هەر لایەكەوە بێت ڕەتدەکاتەوە.
داواش لە دەوڵەتی تورک کراوە، پابەندی دراوسێیەتی باش بن بەپێی ڕێککەوتنە نێودەوڵەتییەکان و ئەو پێشێلکاریانە بەپێی بەرژەوەندییە هاوبەشەکانی هەردوو وڵات بوەستێنن.
شانەی ئەمنی عێراق داوا دەکات، ئەو هێرشانە دووبارە نەبنەوە و ئامادەیی عێراقی دەربڕی بۆ هاوكاریكردن و چارەسەركردنی بابەتی ئەمنیی سنووری هەردوولا.
س.س