پارێزگارى بانکى ناوەندیی عێراق ڕایگەیاند، هیچ نیازێکیان نییە بۆ کەمکردنەوە یان گۆڕینى بەهاى دۆلار بەرانبەر دینار، دەشڵێت: ڕەشنووسی یاسایەکمان بۆ لابردنی سفرەکانی دینار پێشکەشی حکومەتی پێشووی عێراق کردووە.
مستەفا غالب، پارێزگارى بانکى ناوەندیی عێراق لەمیانەى بەڕێوەچوونى دیدارى ڕافیدەین لە شارى بەغدا، وتارێکی پێشکەشکرد و وتی:”پرۆسەی سڕینەوەی سفرەکانی دینار پێویستی بە دەرکردنی یاسایەک هەیە، بۆ ئەو مەبەستەش ڕەشنووسی یاسایەکمان ئامادەکردووە و پێشکەشی حکومەتی پێشوومان کردووە”.
وتیشی:”ئەو ڕەشنووسە پێویستی بە هەموارکردنەوە هەیە و دەرکردنی پێویستی بە کەشێکی ئارام هەیە، چونکە سڕینەوەی سفرەکان پەیوەندیی ڕاستەوخۆی بە ئابووری و نرخی بازاڕی وڵاتەوە هەیە”.
لەبارەی گۆڕانکاریى لە نرخى دۆلار بەرامبەر دینار، پارێزگاری بانکی ناوەندیی دەڵێت:”هیچ نیازێکمان نییە بۆ کەمکردنەوە یان گۆڕینى بەهاى دۆلار بەرانبەر دینار”.
ئاشکراشی کرد، لە چەند ڕۆژی داهاتوودا دراوێکی نوێی ٢٠ هەزار دیناریی دەخەنە بازاڕەوە، وتیشی: نرخی سوودەکان لەپێناو گەشەپێدانی پرۆژەکاندا کەمدەکەینەوە، بەتایبەتیش پرۆژە و یەکەکەنی نیشتەجێبوون، کە ڕێژەی ٣٠٪ی پارەی تەرخانکراویان پێدەدرێت.
ڕۆژى ٢٠ – ١٢ – ٢٠٢٠، بە نوسراوێک، کە واژۆى پارێزگارى ئەوکاتى بانکى ناوەندى عێراقى بە وەکالەت لەسەر بوو، بڕیاردرا نرخی دۆلاری ئەمریکیی بەرامبەر دیناری عێراقیی بەرزبکرێتەوە، بەشێوەیەک هەر ١٠٠ دۆلارێک بەرامبەر ١٤٦ هەزار دینار لەلایەن وەزارەتى داراییەوە دەفرۆشرێت و هەر ١٠٠ دۆلارێکیش لەلایەن بانکەکانەوە بە ١٤٧ هەزار دینار دەفرۆشرێت.
ئ.م
