ئەندامێکی لیژنەی ئاسایش و بەرگریی ئەنجومەنی نوێنەرانی عێراق ئیدانەی بۆردوومانەکانی دوێنێی دەوڵەتی تورک لە ئاغجەلەر و مەخمور دەکات و ڕایدەگەیەنێت، کە بێدەنگ نابن بەرامبەر ئەو هێرشانە و لە چەند ڕۆژی داهاتوودا کۆبوونەوەی تایبەت بەو پرسە ئەنجامدەدەن.
جەواد ئەلبۆلانی، ئەندامی لیژنەی ئاسایش و بەرگریی ئەنجومەنی نوێنەرانی عێراق لە لێدوانێکدا بۆ ڕۆژنیوز لەبارەی هێرشەکانی دوێنێی دەوڵەتی تورک لە سنووری ئاغجەلەر لە شارۆچکەی چەمچەماڵ و کامپی پەنابەرانی مەخمور ڕایگەیاند: عێراق بووەتە گۆڕەپانی یەكلاییكردنەوەی حسابەكانی ناوچەكە، توركیا بەهۆی بەردەوامیی بۆردوومانكردنی خەڵكی مەدەنیی و بەردەوامیی لەشكركێشییە سەربازییەكانی، سەروەریی عێراقی شکاندووە.
جەختیشیکردەوە، کە لیژنەکەیان بێدەنگ نابێت لە شەهیدکردنی هاوڵاتیی مەدەنیی بە بۆردوومانی تورکیا و وتی: لە چەند ڕۆژی داهاتوودا لیژنەكە كۆبوونەوەی تایبەت بۆ تاوتوێكردنی دۆسیەی لە شكركێشییەکانی توركیا ئەنجام دەدات.
ئەلبۆلانی جەختیشی کردەوە، کە ئەو بیانووەی تورکیا بەکاریدەهێنێت بۆ ئەنجامدانی هێرشەکانی زۆر لاوازە و دەڵێت: ئەمە چارەسەر بۆ کۆنترۆڵکردنی دۆخەکە ناڕەخسێنێت، بەڵکو دەبێتە هۆی تێکچوونی دۆخی ئەمنی لە وڵاتدا، هەمووان ڕووبەڕووی مەترسی و هەڕەشەی زیاتر دەبنەوە.
ئەو ئەندامەی لیژنەی ئاسایش و بەرگریی عێراق دەڵێت: عێراق پابەندە بە پاراستنی سەرەوەریی وڵاتەکەی، گرنگە هەوڵی بەهێزکردن و هەماهەنگی و پەیوەندییەکان لەگەڵ لایەنە جیاوازەکان بدرێت لەڕێگەی دەستپێشخەریی و هەوڵە دیپلۆماسییەکانەوە لەپێناو وەستاندنی فراوانخوازییەکانی تورکیا، کە وەرچەرخانێکی مەترسیدار بەدوای خۆیدا دەهێنێت.
ب.ل
