سەرکردەیەکى دەوڵەتى یاسا ڕایگەیاند، هاوپەیمانییەکەمان خواستی ئەوەی هەیە کە نوری مالیکی، سەرۆکی هاوپەیمانی دەوڵەتی یاسا بۆ سەرۆکایەتی حکومەتی داهاتوو کاندید بکات، چونکە باوەڕیان وایە کەسایەتییەکی بەهێز بۆ سەرۆکایەتی حکومەت، مانای بوونی حکومەتێکی بەهێزە.
فازڵ موات کەسار، سەرکردە لە هاوپەیمانی دەوڵەتی یاسا لە لێدوانێکى ڕۆژنامەوانییدا ڕایگەیاند: هاوپەیمانى چوارچێوەی هەماهەنگیی شیعەکان خواستی ئەوەیان هەیە، کە نوری مالیکی بۆ پۆستی سەرۆکی حکومەتی نوێی عێراق کاندید بکات.
ئەو سەرکردەى دەوڵەتى یاسا ڕاشیگەیاندووە: هۆکاری ئەو خواستەش ئەوەیە مالیکی توانا و ئەزمونێکی زۆری لە چۆنیەتی بەڕێوەبردنی ئەو قەیرانانە هەیە، کە روبەڕوی عێراق بوونەتەوە.
فازڵ موات کەسار ئەوەشى خستووەتەڕوو: هەمو لایەنەکانیش باوەڕیان وایە، کە نورى مالکى کەسایەتییەکی بەهێزە بۆ سەرۆکایەتی حکومەت، ئەوەش مانای بوونی حکومەتێکی بەهێزە لە عێراق.
ئەو سەرکردەى دەوڵەتی یاسا باسی لەوەشکردووە: کاندیدکردنی نورى مالیکی بۆ پۆستی سەرۆک وەزیرانى داهاتووى عێراق لە بەرژەوەندیی وڵات و چارەسەرکردنی سەرجەم کێشەکاندایە.
جێگەى ئاماژەیە، ڕۆژى ١٤ ى ئەم مانگە هاوپەیمانى چوارچێوەی هەماهەنگی شیعەکان لە ڕاگەیەندراوێکدا رەتیانکردەوە، کە لە کۆبونەوەکانیاندا لەگەڵ لایەنە سیاسییەکان باسیان لە هیچ ناوێک بۆ هیچ پۆستێکی دیاریکراو کردبێت، چونکە ئەوان گفتوگۆ لەگەڵ هەمو لایەنەکان دەکەن بۆ پێکهێنانی حکومەتێک، کە لەئاست داخوازییەکانی هاوڵاتیاندا بێت.
ئ.م
