ئەندامێکی لیژنەی دەرەوەی ئەنجوومەنی نوێنەرانی عێراق، لە بارەی هەڕەشە و داگیرکارییەکانی دەوڵەتی تورک دژی شەنگال و هەرێمی کوردستان هۆشداریدەدات و دەڵێت: دەبێت کازمی ڕێگری بکات لە هەر ئۆپەراسیۆنێکی سەربازیی و پێویستیش بوو کازمی لە سەردانەکەیدا بۆ ئەنقەرە کۆتایی بە پێشێلکارییەکانی ئەو دەوڵەتە بهێنایە.
بە گوێرەی هەواڵی میدیا عێراقییەکان موختار موسەویی، ئەندامی لیژنەی کاروباری دەرەوەی ئەنجوومەنی نوینەرانی عێراق، لە بارەی هەڕەشە و داگیرکارییەکانی دەوڵەتی تورک دژی شەنگال و هەرێمی کوردستان ڕایگەیاندووە، ئەنجامدانی هەر ئۆپەراسیۆنێکی دەرەکی لە ناو خاکی عێراقدا پێشێلکردنی سەروەریی عێراقە و ئاسایش و سەقامگیری تێکدەدات، جەختیشیکردووەتەوە کە پێویستە مستەفا کازمی ڕێگری بکات لە هەر ئۆپەراسیۆنێکی سەربازی دژی هەر هێزێک بێت لە ناو خاکی عێراق.
ئەو پەرلەمانتارە ئاماژەی بەوەش کردووە، “دەبوو کازمی لە سەردانەکەیدا بۆ ئەنقەرە کۆتایی بە پێشێلکارییەکانی تورکیا لە خاکی عێراق بهێنێت، بەڵام تەنها سەردانێکی پرۆتۆکۆلی ئەنجامداوە”.
ئەو لێدوانەی موسەوی دوای ئەوە دێت کە دوێنێ ئەردۆغان، سەرۆکی دەوڵەتی تورک، لەچوارچێوەی سیاسەتە شەڕنگێزییەکانی، وتی: “هێرشی سەربازیی دژی شارۆچکەی شەنگال لە عێراق ئەنجامدەدەین”، ئەو لێدوانەش دوای ئەوە هات کە خولوسی ئاکار، وەزیری بەرگری دەوڵەتی تورک، ١٩ی ئەم مانگە سەردانی بەغدا و هەولێری کرد و خواستیبوو عێراق بخاتە ناو سیاسەتە شەڕخوازانەکانی بۆ ئەوەی بەشداری شەڕ بێت دژی پەکەکە بەڵام بە دەستی بەتاڵ گەڕایەوە.
ک.س
