شەوی ڕابردوو هاوپەیمانی چوارچێوەی هەماهەنگی (الإطار التنسيقي)ی شیعەکان لە ماڵی نوری مالیکی سەرۆکی هاوپەیمانی دەوڵەتی یاسا کۆبوونەوە و سەرچاوەیەکیش لە ناو کۆبونەوەکە ڕایگەیاند، تێیدا بڕیاریانداوە، تاوەکو کۆمسیۆنی هەڵبژاردنەکان وەڵامی کۆتایی تانەکانیان نەداتەوە، گفتوگۆکانی پێکهێنانی حکومەت دەستپێنەکەن.
سەرچاوەیەکی ئاگادار لە کۆبونەوەکەی شەوی ڕابردووی چوارچێوەی هەماهەنگی (الإطار التنسيقي)ی شیعەکان بە ماڵپەڕی (بغداد اليوم) ی ڕاگەیاندووە، لە کۆبوونەوەکەدا گەیشتوونەتە ڕێککەوتن، کە هیچ کۆبوونەوەیەک لەسەر پێکهێنانی حکومەت نەکەن تاوەکو کۆمسیۆنی هەڵبژاردنەکان وەڵامی کۆتایی تانەکانیان نەداتەوە.
هەروەها، لە بەشێکى دیکەى قسەکانیدا ئەو سەرچاوەیە وتویەتى، هاوپەیمانییەکەیان بەڵگەی یاسایی لەبارەی دەستکاریکردنی ئەنجامەکانی هەڵبژاردن پێشکەشى کۆمیسیۆن کردووە و چاوەڕێ دەکەن کۆمسیۆن پێداچونەوە بە ئەنجامە راگەیەنراوەکاندا بکات.
لەلایەکى دیکەوە، سەرکردەکانی هاوپەیمانیی دەوڵەتی یاسا باسیان لەوەکردووە، هاوپەیمانییەکەیان لەگەڵ ژمارەیەک لە حزب و لایەنی عێراق کە ڕوانگەی نیشتیمانیی هاوبەشیان بۆ حکومڕانی هەیە گەیشتوونەتە ڕێککەوتن و خاوەنی ٩٥ کورسی پەرلەمانن، بەو پێیەش دەبنە گەورەترین فراکسیۆن بۆ پێکهێنانی حکومەت.
جێگەى ئاماژەیە، لە هەڵبژاردنی پێشوەختەی ئەنجومەنی نوێنەرانی عێراق کە لە ١٠-١٠-٢٠٢١ بەڕێوەچوو، ٢٣ ملیۆن و ٩٨٦ هەزار و ٧٤١ کەس مافی دەنگدانیان هەبوو، ٤٣بەپێی کۆمسیۆن لە ٤٢٪ی ئەو کەسانەی مافی دەنگدانیان هەیە بەشدارییان لە پرۆسەکەدا کرد و دواجاریش بەشێکى زۆرى لایەنە شیعەکان ئەنجامەکەیان ڕەتکردەوە.
ئ.م
