نێردەی تایبەتی نەتەوە یەکگرتووەکان لە عێراق (یونامی) ڕایگەیاندووە، هێرشە مووشەکییەکان بۆ سەر باڵیۆزخانەکان و ناوچە مەدەنییەکان لە عێراق، هەوڵێکن بۆ تێکدانی سەقامگیریی عێراق.
شەوی ڕابردوو نێردەی تایبەتی نەتەوە یەکگرتووەکان لە عێراق (یونامی) بەیاننامەیەکی لەبارەی هێرشە مووشەکییەکەی دوێنێ ١٣ی ١ی ٢٠٢١ی سەر باڵیۆزخانەی ئەمریکای لە ناوچەی سەوزی بەغدا بڵاوکردەوە.
یونامی ڕایگەیاندووە: هێرشی مووشەکی بۆ سەر باڵوێزخانەکان و بوونەهۆی بریندارکردنی هاوڵاتییانی عێراقی، هەوڵی بێبەزەییانەیە بۆ ناسەقامگیرکردنی وڵاتەکە.
نەتەوە یەکگرتووەکان جەختیشیکردووەتەوە، کە “ئاشتی و ئاسایش بنەمای سەرەکین بۆ بەدەمەوەهاتنی بابەتە لەپێشینە ناوەخۆییەکان و دووپاتکردنەوەی سەروەریی عێراق”.
ئەمە لەکاتێکدایە، ئێوارەی دوێنێ هێرشێکی مووشەکی کرایە سەر باڵیۆزخانەی ئەمریکا لە ناوچەی سەوزی بەغدا، بەڵام مووشەکەکەیان لەلایەن سیستمی بەرگریی ئاسمانیی باڵیۆزخانەکەوە خرانە خوارەوە.
ب.ل
