چاودێرێکی سیاسیی عێراقیی ئاشکرای دەکات، چاوەڕوان دەکرێت هەفتەی داهاتوو چوارچێوەی هەماهەنگی لەگەڵ پارتی دیموکراتی کوردستان (پەدەکە) هاوپەیمانی سەروەریی سوننەكان لەسەر یەک مێز کۆببنەوە، بۆ گفتوگۆکردن لەسەر پێکهێنانی حکومەتی عێراق.
سەعد مەتڵەبی، چاودێری سیاسیی عێراقیی لە لێدوانێکدا بۆ ڕۆژنیوز ئاشکرایکرد، بەپێی ئەو زانیارییانەی کە لەبەردەستماندایە، هەفتەی داهاتوو چوارچێوەی هەماهەنگی و پارتی دیموکراتی کوردستان و هاوپەیمانی سەروەری کۆدەبنەوە.
ئاماژەی بەوەشکرد، کە کۆبوونەوەکە بۆ تاوتوێکردنی پێکهێنانی کابینەی نوێی حکومەتی عێراقە.
هەروەک ئەوەشی خستەڕوو، کە چوارچێوەی هەماهەنگیی بەردەوامە لە هەوڵەکانی بۆ پێکهێنانی حکومەتی داهاتووی عێراق، ئەگەریش هەفتەی داهاتوو ئەو سێ لایەنە گەیشتنە ڕێککەوتن، ئەوە دەرەنجامی ئەرێنیی دەکاتە سەر هەنگاوەکانی پێکهێنانی حکومەت.
ئەوەش لەکاتێکدایە، چاودێران پێیان وایە كشانەوەی رەوتی سەدر لە پرۆسەی سیاسی دەرفەتێكی گەورەی بۆ چوارچێوەی هەماهەنگی ڕەخساندووە، بۆ پێكهێنانی حكومەتی داهاتوو، بەو مەرجەی دەرگای بەڕووی لایەنەکانی دیکەدا كراوە بێت.
ب.ل
