ئەندامێکى ئەنجومەنى نوێنەرانى عێراق ڕایگەیاند، لیژنەى بەرگرى و ئاسایشى پەرلەمان یاداشتێکى ئامادە کردووە، کە واژۆى زۆرینەى ئەندامەکانى لەسەرە و تایبەتە بە دەرکردنى سوپاى وڵاتانى دیکە لەخاکى عێراق، لەوانەش سوپاى تورکیا.
عەلی فەتلاوی ئەندامی ئەنجومەنی نوێنەرانی عێراق، لە فراکسیۆنى هاوپەیمانى فەتح بە ڕۆژنیوزى ڕاگەیاند، لە چەند ڕۆژى ڕابردوودا لیژنەى بەرگرى و ئاسایشى پەرلەمان بە مەبەستى دانانى ڕێکارێک بۆ ڕێگرى لە هێرشەکانى تورکیا بۆسەر خاکى عێراق کۆبوەوە.
عەلی فەتلاوی باسیلەوەشکردووە، لەو کۆبونەوەدا یاداشتێک، کە واژۆى زۆرینەى ئەندامەکانى لەسەرە و تایبەتە بە دەرکردنى سوپاى وڵاتانى دیکە لەخاکى عێراق، ئامادەکرا لەوانەش دەرکردنى سوپاى تورکیا لە عێراق.
لە کۆتاى قسەکانیدا ئەو ئەندامەى ئەنجومەنى نوێنەرانى عێراق ئەوەى خستووەتەڕوو، توركیا لە ئێستادا هەوڵدەدات ئۆپراسیۆنەكانی لە ناو خاکى عێراقدا فراوانتر بكات، کە ئەمەش داگیركارییەكی ڕاستەوخۆیە و كاریگەری لەسەر سەروەری عێراق هەیە.
جێگای ئاماژەیە، ئەنجومەنی نوێنەرانی عێراق هەفتەی ڕابردوو دانیشتنێكی داخراوی بە مەبەستى تاوتوێكردنی هێرشەكانی دەوڵەتی داگیركەری تورك و ڕژێمى ئێران بۆ سەر خاكی عێراق و ناوچەكانی هەرێمی كوردستان ئەنجام دا، بەڵام بەبێ ئەنجام کۆتاى هات و بڕیاردرا دانیشتنەکە بۆ ڕۆژى پێنجشەممەى ئەم هەفتەیە دوابخرێت.
هـ.ئ
