عەلی فەتلاوی رایگەیاند، بەو پێیەى لەكاتی ڕوودانی دزیی سەدەدا كازمی سەرۆك وەزیرانی عێراق بووە رێكارەكانی لێكۆڵینەوە لە پارە دزراوەكەی دەستەی گشتی باج ئەویش دەگرێتەوە، دەشڵێت، دەسەڵاتی تەواو دراوەتە لیژنە پێكهێنراوەكان و بۆئەوەی چاوپۆشی لە هیچ كەس و لایەنێك نەكەن.
عەلی فەتلاوی، ئەندامی ئەنجومەنى نوێنەرانى عێراق، لە فراکسیۆنى هاوپەیمانی فەتح بە میدیا عێراقییەكانی راگەیاندووە، بەو پێیەى لەكاتی ڕوودانی دزیی سەدەدا كازمی سەرۆك وەزیرانی عێراق بووە رێكارەكانی لێكۆڵینەوە لە پارە دزراوەكەی دەستەی گشتی باج ئەویش دەگرێتەوە.
ئاماژەی بەوەشكردووە، دۆسیەی لێكۆڵینەوە و بەدواداچوون بۆ دۆزینەوە و دیاریكردنی سەرجەم تۆمەتبارانی دزینی دوو ملیار و ٥٠٠ ملیۆن دۆلارەكەی دەستەی گشتی باجەكان، كە بەدزیی سەدە ناسراوە بەردەوامە.
لە کۆتاى قسەکانیدا ئەو ئەندامەى ئەنجومەنى نوێنەرانى عێراق باسیلەوەشکردووە، دەسەڵاتی تەواو دراوەتە لیژنە پێكهێنراوەكان و بۆئەوەی چاوپۆشی لە هیچ كەس و لایەنێك نەكەن، كە لەو دۆسێیەدا تێوەگلابێت.
هاوکات، لەماوەی ڕابردودا بڕی دوو ملیار و ٥٠٠ ملیۆن دینار لە پارەی باج لە بانكی ڕافیدەین دزرا، دواتر هێزە ئەمنییەكان توانیان تاوانباری سەرەكی دزییەكە، كە نور زوهێر جاسم بوو دەستگیر بكەن و بەهۆی گەورەی قەبارەی دزییەكەوە لەمیدیا عێراقییەكاندا بە دزی سەدە ناسێنرا.
جێگەى ئاماژەیە، دوێنی محەمەد شیاع سودانی، سەرۆک وەزیرانى عێراق لە كۆنگرەیەكی ڕۆژنامەوانیدا ڕایگەیاند، دوای هەوڵدانێكی زۆر توانیمان بڕی ١٨٣ ملیار ٧٠٠ ملیۆن دینار لە پارەی دزراوی عێراق، کە بەدزى سەدە ناسراوە بگەڕێننەوە.
ه.ئ
