پێنجشەممە, 18 يون 2020 – 14:01 ڕۆژنیوز – ناوەندی هەواڵەکان
پەرلەمانتار مەنسور بعێجی ئەمڕۆ لە بەیاننامەیەکدا ڕایگەیاندووە، وەڵامی حکومەت بۆ هێرشەکانی تورکیا، زۆر شەرمنانەیە و دیبلۆماسیانە نیەو یەکسان نییە و بەو دەستدرێژیانەی تورکیا کە دەیانکاتە سەر خاکی عێراق و ئەم کارانە مەترسی جدین و ناکرێت حکومەت بێدەنگییان لەبەرامبەردا هەڵبژێرێت.
هەروەها دەڵێت، ئەم دوژمنکارییەی تورکیا یەکەمجار نییە، دووبارەبوونەوەشی لەبەر بێدەنگی عێراقە کە هەڵوێستی لاواز و بێدەنگە.
ئەو پەرلەمانتارەی دەوڵەتی یاسا داواش دەکات حکومەت هەڵوێستی خۆی ڕوونبکاتەوە لەسەر ئەو پێشێلکارییانەی دەکرێنە سەر عێراق لەلایەن تورکیا و دەشپرسێت “ئایا بێدەنگبوونی شەرمنانەی عێراق لەبەرامبەر تورکیا بۆچییە؟ ئایا ئەنقەستە یان غەیر ئەنقەست، هەر لەبەرئەوە پێویستە عێراق هەڵوێستی خۆی لەبەردەم گەلی عێراق ڕوون بکاتەوە کە سوێندی خواردووە پارێزەری خاک و ئاسمان و ئاوەکەی بێت، ئایا ئەم سوێندە تەنها ئەوەندەیە بۆ پارێزگاری لە وڵات؟“.
پێشیوایە دەبێت حکومەت وەڵامێکی بەهێز و گورزێکی جەرگبڕ لە تورکیا بدات بۆ کۆتاییهێنان بەو پێشێلکاریانە و واز لە بەیاننامەی شەمنانە و بانگهێشتکردنی باڵیۆزی تورکیا بهێنێت و یاداشتی ڕادەست بکات، چونکە تورکیا دوژمنێکی تاوانکارە و پێویستە وەڵامێکی هاوشێوەی هێرشەکانی خۆی بدرێتەوە تا هێرشەکانی دووبارە نەکاتەوە.
تا دێت شەقامی سیاسی و جەماوەری عێراق بەرامبەر هێرشە ملهوڕییەکانی دەوڵەتی تورک لەسەر خاکی عێراق زیاتر دەبن بەتایبەت لە ئێستادا نە حکومەتی هەرێم و نە حکومەتی عێراق هەڵوێستی خۆیان لەوبارەیەوە دەرنەبڕیوە و بێدەنگن.
ک.س
