فائزە هاشمی، چالاكی سیاسیی و كچكی ئەكبەر هاشمی ڕەفسەنجانی، چوارەم سەرۆک کۆماری ئێران لە لایەن هێزەكانی ئەو وڵاتە لە تاران دەستبەسەر كرا.
شەوی ڕابردوو فائزە هاشمی، چالاكی سیاسی و كچی ئەكبەر هاشمی ڕەفسەنجانی، چوارەمین سەرۆك كۆماری ئێران، لە لایەن هێزەكانی ئێران لە تاران دەستبەسەر كرا.
ئاژانسی هەواڵی تەسنیمی نزیك لە سوپای پاسدارانی ئێران هەواڵەكەی پشتڕاستكردووەتەوە و بڵاویكردووەتەوە، شەوی ڕابردوو فائزە هاشمی لەلایەن “دەزگایەكی ئەمنییەوە” دەستگیركراوە.
بەپێی ئاژانسەكە، فائزە هاشمی بە پاساوی “هاندانی خۆپێشاندەران بۆ ئەنجامدانی ناڕەزایەتییەكان” لە ڕۆژهەڵاتی تاران دەستبەسەر كراوە.
ئەمەش لەكاتێكدایە لە ڕۆژانی ڕابردوودا تۆمارێكی دەنگیی فائزە هاشمی بڵاوكرایەوە، كە تێیدا ئەو چالاكوانە سیاسییەی ئێران باس لەوەدەكات، حكومەت بۆ دۆزینەوەی بیانوویەك بۆ سەركووتكردن، ناڕەزاییەتییەكانی ئەم دواییانە بە “ئاژاوە” لەقەڵەم دەدات.
دەستگیر كردنی فائزە هاشمی لە كاتێكدایە، دوای كوژرانی ژینا ئەمینی لە ڕۆژی ١٦ی ئەم مانگە و سەرهەڵدانی ناڕەزاییەتیەكان دژی كۆژرانی ئەو كچە كوردە، لەسەرتاسەری ئێران و ڕۆژهەڵاتی كوردستان بە سەدان چالاكوانانی سیاسی، مەدەنی، مافی مرۆڤ و ڕۆژنامەنووس دەستگیر كراون، بەڵام تائێستا حكومەتی ئێران ژمارەی فەرمی دەستگیر كراوانی ئاشكرا نەكردووە.
ڕ.ڕ
