مستەفا کازمی سەرۆک وەزیرانی عێراق لە ماڵی هادی عامری سەرۆکی هاوپەیمانی فەتح، لەگەڵ بەرپرسانی گروپە چەکدارەکانی حەشدی شەعبیدا کۆبوویەوە، تیایدا ئەو گروپانە داوای گەرەنتییان لە کازمی کردووە پێش سەردانەکەی بۆ ئەمریکا و واژۆکردنی هیچ ڕێککەوتنێک لەگەڵ ئەو وڵاتە.
ئێوارەی ڕۆژی شەممە کازمی لە ماڵی هادی عامری سەرۆکی هاوپەیمانی فەتح لەگەڵ بەرپرسانی باڵای گروپە چەکدارییەکانی سەر بە حەشدی شەعبی کۆبویەوە، بەوتەی میدیا عێرقیەکان، گروپەکان ترسیان هەیە کازمی بگەڕێتەوە بۆ پرۆژەی ملکەچبوونی ئەمریکا و لە هەوڵی ئەوەدان گەرەنتی لە حکومەت وەرگرن کە لە هێڵە سورەکان دەرباز ببن.
کازم فرتوسی، وتەبێژی کەتائیبی “سيد الشهداء” ڕایگەیاندووە، بەرپرسانی هاوپەیمانی فەتح و گروپە بەرگریکارەکانی، لەگەڵ کازمی کوبونەتەوە لە ماڵی عامری بۆ گفتوگۆکردن لەسەر کارنامەی سەردانەکەی مستەفا کازمی بۆ واشنتۆن و پێداگری عێراق لەسەر کردنە دەرەوەی هێزەکانی ئەمریکا لەسەر خاکی عێراق و دووپاتیان کردووەتەوە کە ئەگەر بەرپرسانی باڵای ئەمریکا مەرجی کشانەوەیان لە عێراق پەسەند نەکرد، بەهیچ جۆرێک کازمی دانوستان و گفتوگۆیان لەگەڵدا نەکات.
جگە لە کەتائیبی ئەهلی حەق، تەواوی بەرپرسانی باڵای گروپە چەکدارییەکان بەشدارییان لەو کۆبونەوەیەی کازمیدا کردووە لە ماڵی هادی عامری.
هەروەها باسی لەوە کردووە کە چەند پرسێکی گەرم لەو کۆبونەوەیەدا وروژێنراوە لە نێویشیاندا بە ئامانج گرتنی چەند لایەنێکی دیاریکراو لەلایەن کازمییەوە.
هاوکات کەریم عەلەوی جێگری کوتلەی هاوپەیمانی فەتح لەبارەی ناوەڕۆکی کوبونەوەکە ڕایگەیاندووە، ئامانجی کۆبونەوەکەیان لەگەڵ کازمی، زانینی نیاز و مەبەستی کازمییە لەم سەردانەی بۆ واشنتۆن و گفتوگۆکردن لەبارەی دۆسیەی هەڵبژاردنەکان و کاتی بەڕێوەچوونی.
هەفتەی ڕابردووش مستەفا کازمی لەگەڵ سەرۆکی کوتلە شیعیەکانی ناو پەرلەمان کۆبویەوە و حامانجی سەردانەکەی بۆ واشنتۆن بۆ ڕونکردنەوە کە لەنێویاندا دۆسیەی ئابووری، نەوت، وەبەرهێنان و وزەی کارەبا و پێشخستنی کەرتی تەندروستی هەیە و بڕیارە ٢٠ی ئەم مانگە ئەنجامی بدات.
ی. ک
