ڕۆژەڤی ١٢-٥-٢٠١٩

-ئەمڕۆ دەستەی سەرۆکایەتی پەرلەمانی هەرێم کۆدەبێتەوە بۆ کردنەوەی دەرگای خۆپاڵاتن بۆ پۆستی سەرۆکی هەرێم.


-ژماره‌یه‌ک پارێزه‌ر و جوتیاری قه‌راج و که‌ندێنانه‌وە و مه‌خموور یاداشتێک له‌ باره‌ی ڕێگرییه‌کانی داعش ئاڕاسته‌ی په‌رله‌مانی هەرێمی کوردستان ده‌که‌ن به ‌مه‌به‌ستی گه‌ڕانه‌وه‌ی هێزی پێشمه‌رگه‌ بۆ ناوچه‌که‌، چونکه‌ له‌ ئێستادا داعش ‌ڕه‌شه‌یه‌ بۆ سه‌ر ژماره‌یه‌ک گوند و ڕێگه‌ ناده‌ن جوتیاران دروێنه‌ بکه‌ن، ئەمڕۆ کاتژمێر ١١ی پێش نیوەڕۆ لە هەولێر.

-مانگرتنەکان دژی گۆشەگیریی سەر ئۆجالان لە کوردستان و وڵاتانی دەرەوە بەردەوامیی هەیە، ئەمڕۆ لە شاری سلێمانی گروپێکی نوێ دستبەمانگرتن دەکەن.

-مامۆستایەکی ئاینی داوا لە هەمووان دەکات، کە دژی هێرشەکانی دەوڵەتی تورک لە باشوری کوردستان بێدەنگ نەبن و ڕاشیدەگەیەنێت، هەرکەسێک هاوکاریی دەوڵەتی تورک بکات، "لە کوشتنی مرۆڤێکەوە تا هەڵوەرینی گەڵای دارێک تاوانبارە".

-باران بارینی زۆر زیانی لە گەنم و بەروبوومی سەوزە و شووتی و کاڵەکی ئەمساڵی دەشتی شارەزوور داوە، چاندنی هەندێکیشیانی دواخستووە و جوتیارانی سنورەکەش دەڵێن: چاوەڕوان دەکرێت بەرهەمی ئەمساڵیان کەمبێت، بەرپرسانی کشتوکاڵی سنورەکەش جەختدەکەنەوە کە بەرهەمی ئەمساڵی جوتیاران زیانی زۆری بەردەکەوێت.

-فەرهاد چۆمانی نووسەر و وەرگێڕ، دووەم کتێبی سەلاحەدین دەمیرتاش، هاوسەرۆکی پێشووی پارتی دیموکراتی گەلان-هەدەپەی لە زمانی تورکییەوە وەرگێڕایە سەر زمانی کوردیی- زاراوەی سۆرانیی.

-ئەمڕۆ ساڵیادی لە سێدارەدانی لەیلا قاسم-ە، دوای ٤٥ ساڵ ئەوەی دەگوزەرێت، هێشتا مێژوو هەڵگری ناسنامە و تێکۆشانی لەیلا شۆڕشگێڕەکانە، خەباتی لەیلاکان، کە لە لەیلا قاسم-ەوە تا لەیلا والی لە باشوور و لەیلا خالیدی فەلەستین و لەیلا گۆڤەنی باکوور درێژ بووەتەوە هێشتا بەردەوامە.

-ساڵێک بەر لە ئێستا خولی چوارەمی هەڵبژاردنی پەرلەمانی عێراق بەڕێوەچوو، تێیدا ٣٢٩ ئەندامی ئەنجومەنی نوێنەرانی عێراق هەڵبژێردران، بەڵام دوای ساڵێک هێشتا حکومەتی عێراق بە سەرۆکایەتی عادل عەدولمەهدی بە تەواوی پێکنەهاتووە و ناتەواوە، ئەوەش بەهۆی ناکۆکی قوڵی نێوان هێزە سیاسییەکان لەسەر پشکیان لە حکومەت.