ڕۆژەڤی ١٦-٧-٢٠١٩

د.فایەق محەمەد گوڵپی، سیاسەتمەدار و سەرۆکی پێشووی پارتی چارەسەری دیموکراتی کوردستان-پەچەدەکە، هاوڕێیەکی ٢١ ساڵەی شەهید دیار غەریبە و لە چەندین قۆناغی سیاسیی جیاجیادا پێکەوە کاریان کردووە، کە دیارترینیان لە پەچەدەکە-دا بووە، لەم دیدارەیدا لەگەڵڕۆژنیوز، هەندێک بەسەرهاتی خۆی لەگەڵ شەهید دیار غەریب دەگێڕێتەوە و باس لە جێدەستی هاوڕێ شەهیدەکەشی دەکات.


-ئەمڕۆ كۆمەڵەی كورد لە شاری لەندەن پرسەیەك بۆ شەهید دیار غەریب سازدەكات، كاتژمێر ٠٦:٣٠ ئێوارە، هەروەها لە چەند وڵاتێکی دیکەش بەهەمان شێوە مەراسیم بەڕێوەدەبرێت.

-ئەمڕۆ كاتژمێر ١٠:٣٠، لەبەردەم بینای پەرلەمانی هەرێم كوردستان لە شاری هەولێر، هەر سێ كۆمەڵەی كێڵگە پەلەوەرییەكان لە سلێمانی، هەولێر، دهۆك گردبونەوەیەكی ناڕەزایی ئەنجام دەدەن تایبەت بە داواكردنی مافەكانیان و پارێزگاریكردنی حكومەت لە بەرهەمی ناوخۆیی.

-ئەمڕۆ كۆتا دانیشتنی دادگاییكردنی ئەو تۆمەتبارەیە كە كچێكی نیپالی كوشتبوو، بەپێی مادەی ٤٠٦ لەیاسای سزادانی عێراقی، بانگەشە دەکرێت ئەگەر هەیە دادگا سزای لەسێدارەدانی بۆ دەربكات، بۆیە كاتژمێر ٠١:٠٠ بەئامادەبوونی كەسوكاری كچە نیپاڵیەكە و پارێزەرانی، لەبەردەم دادگای هەولێر كۆنگرەیەكی رۆژنامەنووسی ئەنجام دەدەن.

-ئەمڕۆ كاتژمێر ١٠:٠٠شاندێكی حكومەتی عێراق دەگاتە هەولێر كە وەزیری ژینگەی عێراق سەرۆكایەتی دەكات و سێ ڕۆژ لە هەولێر دەبن لە سەر ژینگەی عێراق و هەرێم سیمناریان دەبێت.

-ئەمڕۆ كاتژمێر١١:٠٠، پرێس كۆنفرانسێكی رۆژنامەوانی بۆ(نەقیب مافپەروەر/ڕێباز زێوەر مستەفا) بەڕێوەبەری ڕاگەیاندن و پەیوەندییەكانی بەڕێوەبەرایەتی بە رەنگاربوونەوەی توند و تیژی دژی ئافرەتان و خێزان/هەولێر بەڕێوە دەچێت كە تیایدا ئامارەكانی توند و تیژی خێزانی و ژنان لە ماوەی شەش مانگی ئەمساڵ لە سنوری پارێزگای هەولێر دەخرێتە ڕوو.

-ئەمڕۆ كاتژمێر١١:٢٠ كۆمەڵەی كەمئەندامانی كوردستان لەبەردەم ئەنجوومەنی وەزیران لە دیوی شەقامی ٦٠ مەتری گردبوونەوەیان هەیە و یاداشتنامەی خۆیان ئاراستەی حكومەتی نوێ دەكەن .

-ئەمڕۆ كاتژمێر ٠٩:٠٠ خوێندكارانی پۆلی ۱۲ لە شارۆچكەی خورماتوو، گردبونەوەیەكی نارەزایەتی ئەنجام دەدەن.

-تییپەكانی تۆپی پێی ژنان لە هەرێم ڕوو لە گەشەكردنە، یانەی سیروانی نوێ-ش ماوەی چەند مانگێكە تیپی تۆپی پێی ژنانی بۆ یانەكەی زیادكردووە، ژنان ئیدی مۆركی پیاوان لە یاری تۆپی پێ دەسڕنەوە، گەشبینیشن، كە لە ئایندەدا بتوانن لە هەڵبژاردەی تۆپی پێی عێراقدا یاریی بكەن.

-ژمارەیەك لە گوندنشینانی گوندی گەڵاڵەی سنوری شارەدێی بەرزنجە، ساڵانە لەگەڵ هاتنی وەرزی گەرما بۆ ناوچەكەیان، ڕوو لە كوێستانەكانی سنوری شارۆچكەی پێنجوێن دەكەن و ماوەی چەند مانگێك لەو سنورە دەمێننەوە و ئاژەڵەكانیان دەلەوەڕێنن، وەك خۆشیان دەڵێن، لەگەڵ ئەوەی ژیانیان قورسە، بەڵام دڵخۆشن بە كارەكەیان.

-لەكابینەی نۆیەمی حكومەتی هەرێمی كوردستاندا، بێجگە لە چەند وەزیرێكی هەرێم، لەكۆی ١٧ وەزیر كە وەزارەت بەڕێوە دەبەن، ١٠ وەزیریان بڕوانامەكانیان دوورن لەو وەزارەتەی بەڕێوەی دەبەن، ئەوە بێجگە لەوەی جێگریی سەرۆكی حكومەت بەكالۆریۆسی لە میكانیكدا هەیە.