ئەگەرچی بە بەراورد بە شوێنەکانی دیکە دەوترێت ژنان بەرپرسیارێتیی باڵای ئیدارییان زیاتر وەرگرتووە، بەڵام تەنیا ٥٪ی ئەو پۆستانە لای ژنان و ٨٩ پۆستی دیکەی پارێزگاکە لای پیاوانن.
ئەمڕۆ لە شاری هەڵەبجە، لەژێر ناونیشانی ( بەشداریی سیاسیی و مەدەنیی ژن وەك ژن لەپێناو ئاشتییدا) و لەبارەی ڕۆڵ و پێگەی ژن، لە هۆڵی بەڕێوەبەرایەتی چاودێریی و گەشەپێدانی كۆمەڵایەتیی هەڵەبجە، بە هاوكاریی ڕێكخراوی UNFPA ئەنجومەنی باڵای كاروباری خانمان، چالاکییەک بەڕێوەچوو.
لەو چالاکییەدا گرتە ڤیدۆییەك لەسەر خۆپیشاندانی ژنانی سلێمانی پیشاندرا، كە بەپێ لە سلێمانیەوە بەپێی بەڕێكەوتن بۆ بەردەم پەڕلەمانی هەرێمى كوردستان بۆ ئەوەی كۆتایی بەشەڕی ناوخۆ بهێنرێت.
لە لێدوانێکدا بۆ ڕۆژنیوز گوڵستان ئەحمەد، بەڕێوەبەری نووسینگەی مافی مرۆڤی هەڵەبجە وتی:هەندێك لە پیاوان تائێستا ڕێگریی دەكەن، لەوەى ژنان بەشداریی سیاسییان هەبێت و لەوبارەوە دەڵێن، ژن ناتوانێت لە سیاسەتدا كاربكات، ئەوەش بیرو بۆچونێكی هەڵەیە و دەبێت كار لەسەر كاڵكردنەوەی بكرێت.
وتیشی: تائێستا لەمێژووی هەرێمی كوردستان نەبینراوە ژنێك پارێزگار یان بەرپرسی لق و مەڵبەندێك بێت، پێویستە هەموو ئەوانە چاكبركرێت و بەربەستەكانی بەردەمی لاببرێت.
بەڕێوەبەری نووسینگەی مافی مرۆڤی هەڵەبجە باسی لەوەشکرد: بەشداریی ژنان لە كایە سیاسیی و ئیدارییەکاندا لە پارێزگای هەڵەبجە خراپ نییە، بەڵام لە ئاست خواستى ئێمەی ژناندا نیە، چونکە تەنها پێنج پۆستی ئیداریی ژنان بەڕێوەی دەبەن، بەڵام ٨٩ پۆستی دیكە لەلایەن پیاوانەوە بەڕێوە دەبرێت، پێویستە ئەو باڵانسە جێندەرییە ڕاست بكرێتەوە و ڕێگە بدرێت ژنان زیاتر بچنە پێشەوە و ڕۆڵیان پێ بدرێت.
گوڵستان ئەحمەد ئاماژەى بەوەشدا: دەبێت هۆشیاریی كۆمەڵایەتیی و جێندەریی زیاتر بڵاوبكرێتەوە، چونکە ژن دەتوانێت بەرپرسی لق، مەڵبەند، قائیمقام، پارێزگار و وەزیریش بێت، زۆر گرنگە لەم هەڵمەتە نیشتیمانییانەدا كار لەسەر پێگەیاندن و بەرەو پێشبردنى ژنان بكرێت، تاوەكو كۆمەڵگەیەكی هاوسەنگمان هەبێت.
هەروەها، سالار فەتاح، بەڕێوەبەری چاودێریی و گەشەپێدانی كۆمەڵایەتی هەڵەبجە ڕایگەیاند: چالاكیەكەمان لەچوارچێوەى هەڵمەتى ١٦ رۆژەى بەرەنگاربونەوەی توندوتیژی دژ بە ژنان لەژێر ناونیشانی ( بەشداری سیاسی و مەدەنی ژنان لەپێناو ئاشتیدا) بەڕێوەچوو لە پایتەختی ئاشتی هەرێمی كوردستان، كە پارێزگای هەڵەبجەیە.
سالار فەتاح لەبارەى ئامانجى ئەنجامدانى چالاکییەکەوە وتی: دوو ئامانجمان هەبوو لە ئەنجامدانی چالاكییەكەمان، یەکەم ئەو ژنانەی لە مێژووی حكومڕانی گەلی كوردا خەباتیان بۆ دۆزی ژن كردووە ڕێزیان لێبگێرێت، دووەمیش بۆ یادكردنەوەی ڕۆژی ڕێپێوانی ژنانى سلێمانی، كە ئەوكات ژنان بە ڕێپێوان لە سلێمانیەوە بەڕێكەوتن بۆ هەولێر بۆ ئەوەی كۆتای بەشەڕی ناوخۆ بهێنرێت، ئەوەش بەسەرەكترین جموجوڵی ژنان دادەنرێت.
لە کۆتایی قسەکانیدا بەڕێوەبەری چاودێری و گەشەپێدانی كۆمەڵایەتی هەڵەبجە باسی لەوەکرد: دەبێت ڕێز لە ژنان بگرین، هەموو ساڵێك خەڵات بكرێن و تاوەکو ببێتە هەوێنێك بۆ ئەوەی بەهەموو جۆرێك ڕێگە لە توندوتیژی بگیرێت جا ئەگەر توندتیژییەکە سیاسی یان كۆمەڵایەتی بێت.
ئەو پۆستە ئیدارییانەی لای ژنان لە پارێزگای هەڵەبجە، بریتین لە قائیمقامی بیارە، سەرۆکی زانکۆی هەڵەبجە، سەرۆکی شارەوانیی هەڵەبجە، بەڕێوبەری نووسینگەی مافی مرۆڤ و سەرۆکی لیژنە هاوبەشەکانی قائیمقامیەتی هەڵەبجە.
ئ.م
