لەچوارچێوەی چالاکی و مەراسیمەکانی یادکردنەوەی هەشتەمین ساڵیادی کۆمەڵکوژکردنی ساکینە جانسز و هەڤاڵانی لە دوو گوندی بناری قەندیل، چالاکی بەڕێوەچوون، ژنانییش بەڵێن دووپاتدەکەنەوە بەردەوامی بە ڕێبازی شەهیدان بدەن و تێکۆشانی شەهیدان بگەیەننە سەرکەوتن.
کاتژمێر ٣ی پاشنیوەڕۆی ئەمڕۆ ڕێکخراوی ژنانی ئازادی کوردستان، لە هەر یەکە لە گوندی شەروێتی بناری قەندیل و گوندی دووگۆمانی سەر بە شارەدێی سەنگەسەر دوو سیمیناری جیان بەناونیشانی “لە سەر ڕێبازی شەهیدانی مانگی چلە ئازادی مرۆڤایەتی مسۆگەر دەبێت” بۆ بیرهێنانەوەی ساکینە جانسز و هەڤاڵانی سازکرد.
لە سمینارەکاندا باس لە ژیانی ساکینە جانسز و هەڤاڵانی کرا، “ساکینە جانسز وەک ژنێکی پێشەنگ لە گۆرەپانی سیاسی و ئایدۆلۆژی لە ناو ڕێزەکانی پەکەکەدا جێگەی گرتووە و بووەتە سەرکردەیەکی پێشەنگی ژنانی ئازادیخوازی کوردستان، شەهید ساکینە لە سەرەتای ناسینی تەڤگەری ئاپۆچی هەر زوو خولیای کارکردن دەبێت و دەست دەکات بە تێکۆشان، دوای ماوەیەک کارکردن دەستگیر دەکرێت دوای ئازادکردنی لە زیندان دەگەڕێتەوە ناو ڕێکخستن و بەشداری لە چەندین پەروەردەدا دەکات، دواتر دەچێتە چیا و بەشداری لە کۆنفرانس و کۆنگرەکانی تایبەت بە گەنجان دەبێت، لەو چوارچێوەیەدا بۆ کار و خەباتی ڕێکحستنی دەچێتە ئەوروپا و لەوێ درێژە بە کار و تێکۆشان دەدات و دوای ماوەیەکی زۆر لە خەبات و تێکۆشان لە ۹ی کانوونی دووەمی ۲۰۱۳ لە پاریسی پایتەختی فەرەنسا لەگەڵ دوو هەڤاڵی خۆیدا شەهید دەبن”.
هەر لە سمینارەکەدا باس لە وەکرا کە ساکینە، بۆ گەلانی ئازادیخواز و بە تایبەت ژنانی کورد هەموو بووەتە پێشەنگ و ئاستەنگیەکانی بەردەمی شکاندووە و بووە بە ناسنامەی ژنی ئازاد.
ئەوەشخرایە ڕوو کە “ئەمڕۆ ئێمە وەک ژنان دەتوانین ژیانی شەهید ساکینە و هەڤاڵانی بکەینە وانەیەک بۆ ژیان و بەرەو پێش بردن و درێژەدانی خەبات و تێکۆشانی و تا ئاوات و ئامانجەکانیان بەدی دێنین”.
پاش پێشکەشکردنی سیمینارەکان، کورتە فیلمێک لە سەر ژیانی شەهید ساکینە جانسز و لەیلا شایلەمەز و فیدان دۆغان نمایشکرا و دواتر بەشداربووانی سمینارەکە گفتوگۆیان لە سەر ڕێباز و بەردەوامیدانی شەهیدان کرد و بەڵێنیاندا کە تێکۆشانی شەهیدان کە خەباتیان بۆ دەکرد بەردەوامی پێ بدەن.
ک.س
