لە شاری هەولێر، كۆنفرانسێك لەبارەی کیشەکانی ژنان بەڕێوەچوو، تێدا گرفتەكانی بەردەم ژنان و کێشە جێندەرییەکان گفتوگۆیان لەبارەوەکرا.
وەزارەتی كارو كاروباری كۆمەڵایەتی لە چوارچێوەی هەڵمەتەكانی شانزە ڕۆژەی بەرەنگاربوونەوەی توندوتیژی دژی ژنان لەشاری هەولێر كۆنفرانسێكی بە ناونیشانی (پرۆژەی بەرەنگاربوونەوەی توندوتیژی و باڵانسی جێندەر) ئەنجامدا.
کۆنفرانسەکە لە کاتژمێر ١٠ی بەیانی بۆ ٢ی پاشنیوەڕۆ، بە بەشداریی ژمارەیەک لە چالاکوانانی بواری ژنان و پەرلەمانتاران، بەڕێوەچوو، تێیدا لە لایەن کەسانی پسپۆرەوە پرسی ژنان لەڕووی یاسایی و پرسی یەکسانی جێندەریی و ڕۆڵی ژنان لە ڕووی ئابووریی و یاساییەوە خرانەڕوو، دواتریش لە لایەن ئامادەبووانەوە گفتوگۆ لە بارەی پرسەکان و چۆنییەتی چارەسەرکردنیانەوە کرا، لە کۆتایی کۆنفرانسەکەشدا خەڵات بەسەر چەند کەسێکدا دابەشکرا کە ڕۆڵیان لەخستنەرڕووی کێشەکانی ژنان و چارەسەرکردنیاندا بینیوە.
دەربارەی کۆنفرانسەکە ئاریان ئەحمەد، وتەبێژی وەزارەتی كارو كاروباری كۆمەڵایەتی حكومەتی هەرێمی کوردستان، ڕایگەیاند: وەزارەتی كار بەهەماهەنگی ڕێكخراوی (UNFPA)لەچوارچێوەی پڕۆژەیەكی سێ مانگەدا ئەم كۆنفرانسەی ئەنجامداوە و چالاكیەكانی کۆنفرانسەکەش پەیوەست بوو بەهەڵمەتی شانزە ڕۆژەی بەرەنگاربوونەوەی توندوتیژی دژی ژنان لەهەرێمی كوردستان.
وتەبێژی وەزارەتی كار ئاماژەی بەوەشدا لەچوارچێوەی هەڵمەتەكانی بەرەنگاربونەوەی توندوتیژی دژی ژنان نزیكەی ١٦ هەزار پرۆشەری هۆشیاری بڵاودەكەنەوە كە گوزارشت لەبنەبڕكردنی توندوتیژی و چەسپاندنی مافی ژنان دەکەن.
شادی نەوزاد، جێگری سەرۆكی لیژنەی داكۆكی لەمافی ژنانی پەرلەمانی هەرێمی كوردستان، کە لە کۆنفرانسەکەدا بەشداربوو وتارێكی پێشكەشكرد لە لێدوانێکدا بۆ ڕۆژنیوز وتی: لیژنەكەمان لەپەرلەمانی كوردستان داكۆكی لەمافی ژنان دەكات، ڕاستە ئامارەکانی تووندوتیژی بەرامبەر ژنان لەئەمساڵدا کەمبووەتەوە، بەڵام كەمبوونەوەی ئامارەكانی توندوتیژی بەمانای چارەسەری بنەڕەتی كێشەی ژن نایەت، وتیشی: دەبێت زیاتر كار لەسەر پرسی ژنان بكرێت و داكۆكی زیاتر لە مافەكانیان بكرێت.
ک.س
