کۆمسیۆنی ژنانی کەنەکە لەبارەی هێرشەکانی تورکیاوە هەڵوێستیان نیشاندا

 شەوی ١٤ی ئەم مانگە فڕۆکە جەنگییەکانی دەوڵەتی تورک، بۆردوومانی چەندین ناوچەیان کرد لە باشوری کوردستان، ئەوەش ناڕەزایەتی ناوخۆیی و نێودەوڵەتی لێکەوتەوە، لەو چوارچێوەیەشدا کۆمسیۆنی ژنانی کۆنگرەی نەتەوەیی کوردستان- کەنەکە لە باشوری کوردستان، لە ڕاگەیەندراوێکدا هەڵوێستی خۆیان دژی ئەو هێرشانە دەربڕیی.

دەقی ڕاگەیەندراوەکە

بۆردۆمانی پەنابەران لەلایەن تورکیاوە، دوژمنایەتی ئۆردوگان دژی گەلی کورد پیشان دەدات.

بۆ جارێکی دی فڕۆکە جەنگیەکانی تورکیا لە شەوی  ١٤ لەسەر ١٥ حوزەیرانی ٢٠٢٠ بە بیانوی بوونی بارەگای پارتی کرێکارانی کوردستان- پەکەکە لە باشوری کوردستان، بۆردوومانی شەنگال، کامپی مەخمور، باڵاکایەتی، گۆڕەپانەکانی سیدا، شەهید ڕۆستەمی زاپ، ناوچەی وەرتێ خاڵێی هەرێمی ئاڤاشین، ناوچەی سنینێی هەرێمی خواکورک، گۆڕەپانی شەهیدان و سەرگەلێی هەرێمی قەندیلیان کرد، لەکاتێکدا کامپی مخمور، کە خەڵکی مەدەنی تێدایە و بەهۆی زوڵمی دەوڵەتی داگیرکەری تورکەوە هەڵهاتوون و لەم کەمپەکەدا لەسایەی نەتەوە یەکگرتوەکان و حکومەتی عێراقدا نیشتجێبوون.

هەرچەندە هەموو هێرشەکانی ئەردۆغان پرە لە ڕق و کینە، بەڵام هێرشی ئەمجارە  بۆ هەموان ئاشکرایە کە بزانن، ئەردۆغان و ئەکەپە چ بوغز و قینێکی قوڵیان هەیە بەرامبەر کورد، وەکو نەتەوە، چەند جارێک ئەردوغان بە ئاشکرا ئاماژەی بەوە کردووە، کە کورد لەهەر شوێنێک قەوارەی هەبێت ئێمە دژین و بەئاشکراش دژایەتی خۆی بۆ قەوارەی باشوری کوردستان نەشاردووەتەوە، ئەگەر ئەو پاڵپشتیە عێراقی و جیهانییە نەبوایە لە دەسەڵاتدارێتی هەرێم، ئێستا هاوشێوەی هێرشەکانی سەر ڕۆژئاوای کوردستان، قەوارەی هەرێمی کوردستانی دەڕوخاند.

ئەم هێرش و پەلامارانە پێشێلکردنێکی ئاشکرای یاسا نێودەوڵەتیەکان و سەروەری خاکی عێراق وهەرێمی کوردستانە، بوونی چەندین بنکەی سەربازی تورکیش لە خاکی هەرێم، پێشێلکارییەکی ترە و دژی دەستکەوتەکانی هاوڵاتیانی هەرێمی کوردستانە.

پاوەنخوازیی ئەردۆغان و ڕەفتارەکانی تورکیا بووەتە هۆی بارگرژیی و مەترسی بەردەوام لەسەر ئاشتی و ئاسایشی نەک هەر باشور و ڕۆژئاوای کوردستان، بەڵکو مەترسییە بۆ سەر ڕۆژهەڵاتی ناوین.

داواکارین لە، حکومەتی عێراق و بەتایبەت سەرۆکی کۆمار و وەزارەتی دەرەوە، هەر سێ سەرۆکایەتیەکەی هەرێمی کوردستان:

– ھەڵوێستی جدیان ھەبێت و بەڕاشکاوی هەرێم و حکومەتی بەغدا ئەو هێرشە مەحکوم بکەن.

– حکومەتی هەرێم پاڵپشتی حکومەتی عیراق بکەن، داوای یاسایی لەرێگای نەتەوە یەکگرتوەکان و ئەنجومەنی ئاسایش، لەسەر دەوڵەتی تورکیا تۆماربکەن، بەوپێیەی سەروەریی عێراقی پێشێلکردووە و ئاشتی و ئارامی هەرێمایەتی خستووەتە مەترسییەوە.

– حکومەتی هەریم و عیراق داوای دەستبەجی کشانەوەی بنکە سەربازییەکانی تورکیا، لەبەعشیقە و بنکە سەربازییەکانی لەهەرێم بکشێنێتەوە.

– عێراق بەفەرمی لەڕێگای دەزگا نێو دەوڵەتیەکانەوە داوای قەرەبووکردنەوە بکات لە تورکیا کە زەرەر و زیانی گیانی و ماددی لە هاوڵاتیانی هەرێمی کوردستان و عێراق داوە.

– نەتەوەیەكگرتوەكان ئەرکی خۆی بەپێی یاسا نێودەوڵەتیەکان، سەبارەت بە پاراستنی پەنابەرانی کامپی مەخمور بگرێتە ئەستۆ.

د.ع