تاوتوێی ڕۆڵی ژنان لە كایەی ڕۆشنبیری كەركوك  كرا

لە گوندی حەساری گەورە تاوتوێی ڕۆڵ و پێگەی ژنان كرا لە كایەی ڕۆشەنبیری لە شاری كەركوك.


ئێوارەی ئەمڕۆ ڕێكخراوی خاوەن ئایندە بۆ گەنجان بە هاوكاری كتێبخانەی گوندی حەسار، كۆڕێكی بۆ ڕووناك شوانی لە ژێر ناوی( ژنان لە كایەی ڕۆشنبیری)لە شاری كەركوك سازكرد.

لە كۆڕەكەدا ڕوناك شوانی وتی:"لە ڕابردوودا ژنان ڕۆڵ و پێگەی گرنگیان هەبووە لە كایەی ڕۆشنبیری و هونەری شاری كەركوك، لەسەرجەم بوارەكاندا، لە ڕابردوودا ژنان پێشەنگی كاری سینەما و ڕۆژنامەگەری و شانۆ و هونەر بوون، چەندین كەسایەتی هەن كە ناویان لە مێژوو دەمێنێتەوە كە پێشەنگی كۆمەڵگا بوون، هەروەها باسی لە ئازادی و بوێری ژنان كرد لە كەركوك لە سەردەمی كۆندا، كە بێ جیاوازی ڕەگەزی هاوشان لە گەڵ پیاوان كاریان دەكرد".

ئەوەشی ووت:" زۆر لایەنی تر هەبوو كە ژنان پێشەنگ بوون، ژنی كاسبكار و چاو نەترس هەبوو، هەرەوەها ژنان لە ڕیزەكانی پێشمەرگە جێگە و پێگەی تایبەتیان هەبوو، ئێستاش ژنان لە ڕۆژگاری ئەمڕۆدا ڕۆڵ و پێگەی تایبەتیان هەیە، هەرچەندە پێشێلكاری و گێچەڵی سێكسی و ڕێگری زۆر بەرۆكی ژنانیان لەسەرجەم جیهان گرتووە، كەركوكیش بەدەر نیە لەو حاڵەتە".

هەر لە كۆڕەكەدا گفتوگۆ كرا لە نێوان ئامادەبووان و كۆڕگێڕ بە وردی تێشك خرایە سەر نایەكسانی نێوان ژن و پیاو لە كۆمەڵگادا".

د.ح