داوادەکرێت بکوژانی ژنان بە سزا بگەیەندرێن

ڕێكخراوەكانی كۆمەڵگای مەدەنی داوای دەكەن، پەرلەمان کاربکات بۆئەوەی چیتر ژنان نەبنە قوربانیی و بکوژانی ژنان بە سزا بگەیەندرێن.


ئەمرۆ ژمارەیەك  لە ڕێكخراوەكانی كۆمەڵگای مەدەنی هەولێر و سۆران لەبەردەم پەرلەمانی پەرلەمانی كوردستان گردبوونەوەیەكیان ئەنجامدا و لە گردبوونەوەكەدا یاداشتێكیان خوێندنەوە، یاداشتەکەشیان رادەستی پەرلەمان کرد.

هاوار هەركی، نوێنەری ڕێكخراوەكان، یاداشتەكەی خوێندوە، کە تیایدا هاتبوو: ئەمڕۆ هاتین بە پەرلەمانتاران بڵێین، كاربكەن بۆ ئەوەی چیتر ژنان نەبنە قوربانیی دەستی كۆمەڵگای بەبیانووی شەرف و هۆكاری تر.

هەروەها، هاتبوو: پێویستە هەرچی زووە بەدواداچوون لە گشت  ئەو كەیسانەدا بكرێت، کە  تایبەتن بە توندوتیژیی سەر ژنان و هۆكارەكانی توندوتیژیی دیاریی بكرێن، بۆئەوەی ڕێگریی بكرێت لە دووبارە بوونەوەی حالەتەكانی توندوتیژیی.

جەختیشکرابووەوە، کە "دەبێت تاوانبارانی كەیسی توندوتیژیی لە رێگای دادگاكانەوە بەسزای خۆیان بگەیەندرێن، نەک لە دیوەخانەکان و بە سوڵحی عەشایریی کەیسەکان دابخرێن".

ش.ف