داوا لە خەڵکی کەرکوک دەکرێت لە ١٦ی ئۆکتۆبەردا مان بگرن

هاوپەیمانیی كۆمەڵایەتیی هاوڵاتیانی كەركوك، داوا لە هاوڵاتیانی کەرکوک دەکەن لە ١٦ی ئۆکتۆبەر مان بگرن لەپێناو هەڵگرتنی دەسەڵاتیی سەربازیی لە کەرکوک و جێبەجێکردنی جەند داواکارییەکی دیکە.


ئەمڕۆ لە باخچەی شەهیدان لە گەڕەكی شۆریجەی شاری کەرکوک كۆمەڵێك كەسایەتیی، ڕۆژنامەنووس و چالاكوان و بەشێك لە ڕێكخراوەكانی مەدەنیی لە جوارچێوەی گروپێکدا بەناوی (هاوپەیمانیی كۆمەڵایەتیی هاوڵاتیانی كەركوك) و بە دورشمی دەسەڵاتی سەربازیی لەسەر كەركوك هەڵگرن، گردبوونەوە و بەیاننامەیەکیان خوێندەوە.

ڕەمەزان سابیر، رێكخەری گردبوونەوەكە بەیاننامەکەی خویندەوە، کە تیایدا هاتبوو"دوای ئەوەی لە ١٦ی ئۆكتۆبەری ٢٠١٧ هێزەچەكدارەكانی عێراق لە ژێر ناوی سەپاندنی یاسادا هێرشێكی بەربڵاویان كردە سەر شاری كەركوك و دەستیان بەسەر شارەكەدا گرت و هێزە كوردیەكانیش بەبێ هیچ بەرەنگاربوونەوەیەك شارەكەیان چۆڵكرد، لەو رۆژەوە ئیتر ئەم شارە بە یاسا و ڕێساكانی حوكمی سەربازیی بەڕێوە دەچێت و بوونی هەمەر و چەكدار لە شەقامەكانی ئەم شارە بووەتە دیاردەیەكی ڕۆژانە".

لەو بەیاننامەیەدا،  ئاماژە بەوە کردبوو، کە زۆر جار بە تەقەی ئەو هێزانەی لە كەركوكن خەڵكی سڤیل بوونەتە قوربانی، سەبارەت بە پارێزگاری بەوەکالەتی کەرکوک-یش هاتبوو:"پارێزگاری بەوەكالەتی كەركوك نوێنەرایەتی باڵی شۆڤێنیانەی عەرەبی دەكات لە رێگەی گۆرانكاری لە پۆستە ئیداریەكان و نانەوەی كێشەی بۆ جوتیارە كوردەكان و نانەوەی تۆوی ناكۆكیی و دووبەرەكیی لە پاڵ ئەوەش دزیی و گەندەڵی و بێسەروبەرەیی ئەوەندەی تر باڵی بەسەر ئەم شارەدا كێشاوە".

بەیاننامەکە، تیشکی خستبووە سەر دانانی هەردوو خاڵی گومركیی لەسەر رێگاكانی سلێمانی و هەولێر  و تێیدا هاتبوو:"ئەو خاڵانە لە قۆڵبڕین و راوڕووت دەچێت، نەك گومرك ئەمەش ئەوەندەی تر باری سەرشانی خەڵكی گرانتر كردووە".

گروپی هاوپەیمانی كۆمەڵایەتی هاوڵاتیانی كەركوك هەر لە بەیانەكەیاندا داوای مانگرتن لەخەڵكی كەركوك دەكەن و پێیان باشە لە ساڵرۆژی ١٦ی ئۆكتۆبەردا هاوڵاتیان بۆ ماوەی كاتژمێرێك لە كاتژمێر ٩:٠٠ی بەیانیدا دووكان و بازاڕ و كارەكانیان دابخەن و بیوەستێنن وەكو فشارێك بۆ سەر دەسەڵاتی سەربازیی و ئەم خواستانەی لای خوارەوە بكەن بە ئامانجی مانگرتنەكەیان:

1-چۆڵكردنی شار لە دیاردە سەربازیەكان.

2-گەڕانەوەی هەیبەت بۆ ئیدارە مەدەنیەكان.

3-راگرتنی سەرجەم ئەو سیاسەتانەی پارێزگاری كەركوك لەسەر بناغەی نەتەوەگەریی و نانەوەی تۆوی دوبەرەكیی لەنێوان پێكهاتەكان بەڕێوە دەچێت.

4-لادان و هەڵگرتنی ئەو خاڵە گومرکییانە، كە لە ڕاستیدا نایاساییە و دەبێت بەدواداچونی لەسەر بكرێت.

ش.ف