دوو کچی ئێزدی گەڕێندرانەوە هەرێمی کوردستان

دوای نزیکەی شەش ساڵ لە ڕفاندنیان لەلایەن چەتەکانی داعشەوە، دوو کچی ئێزدی لە ڕۆژئاوای کوردستان، لە دەستی چەتەکانی داعش ڕزگار کران و گەڕیندرانەوە بۆ شاری دهۆک، هەتا ئێستاش چارەنووسی ٢ هەزار و ٨٨٧ هاوڵاتی ئێزدی لای چەتەکانی داعش نادیارە.


ئەمڕۆ دوو کچی ئێزدی  لە ماڵی ئێزیدیان لە هەرێمی جزیرەی ڕۆژئاوای کوردستانەوە گەڕێندرانەوە هەرێمی کوردستان.

ئەو دوو کچە ئێزدیە پێش شەش ساڵ لەلایەن چەتەکانی داعشەوە لەکاتی هێرشەکەی سەر شەنگال کەوتبوونەوە دەستی چەتەکانی داعش، ماوەیەک لەمەوبەر لە کامپی هۆڵی خێزانەکانی داعش ڕزگارکرابوون و گەیەندرابوونە ماڵی ئێزدییان لە هەرێمی جزیرە.

حسێن قائیدی بەرپرسی نووسینگەی ڕفیندراوانی ئێزدی لەدهۆک بە رۆژنیوزی ڕاگەیاند: دوو کچی بەناوەکانی لەیلا مراد ١٧ ساڵ و ڕونیا فەیسەڵ ١٧ ساڵ لە دەستی داعش ڕزگاریان بووە، ئەمڕۆ گەڕێندراونەتەوە هەرێمی کوردستان.

بەپێی ئاماری نووسینگەی ڕفیندراوانی ئێزدی لەدهۆک، هەتا ئێستا چارەنووسی ٢ هەزار و ٨٨٧  هاوڵاتی ئێزدی لای چەتەکانی داعش دیار نییە، بەڵام تواندراوە ٣ هەزار و ٥٤٨ هاوڵاتی ئێزدی لەدەستی چەتەکانی داعش لە عێراق و سوریا ڕزگار بکرێت.

لەساڵی ۲٠۱٤ چەتەکانی داعش هێرشیان کردە سەر شنگال، ئەو هێزەی پێشمەرگە کە لەشەنگال بوو کشانەوە و چارەنووسی هاوڵاتیانی ئێزدی کەوتە دەست چەتەکانی داعش، چەتەکانی داعشیش دوای ئەوەی سەدان هاوڵاتی شەنگالیان کۆمەڵکوژ کرد، زیاتر لە شەش هەزار هاوڵاتی ئێزدیان ڕفاند و لە بازاڕەکانی موسڵ و ڕەقە کڕین و فرۆشتنیان پێوە دەکردن.

د.ع