سۆران، ژنێك بە گولـلە كوژرا

لە شارۆچكەی سۆران ژنێك بە گولـلە كوژرا و كەسێكیش بە تۆمەتی كوشتنی ژنەكە خۆی ڕادەستی پۆلیس كردووە.


ئەمشەو لە شارۆچكەی سۆرانی سەر بە پارێزگای هەولێر، ژنێكی تەمەن ٤٢ ساڵان لە ماڵی دراوسێكەی  بە گوللـە كوژرا و پۆلیسی سۆرانیش دەڵێت: ڕووداوەكە بەهۆی لە دەست دەرچوونی گولـلە بووە .

شێروان خالید وتەبێژی بەڕێوەبەرایەتی بەرەنگار بوونەوەی توندوتیژی سۆران بە ڕۆژنیوزی ڕاگەیاند" كاتژمێر ٠٦:٠٠ی ئەم شەو لەلایەن نەخۆشخانەی فریاكەوتنی سۆران ئاگاداركراینەوە  بەبوونی تەرمی ئافرەتێكی كوژراو بە ناوی  ( م،ح،ح )  تەمەن٤٢ ساڵان  بە داخەوە  گولـلەی دەمانچەی بەركەوتووە و دەستبەجێ گیانی لە دەستداوە".

ڕاشیگەیاند" بە پێی وتەی شاهێدانی ڕووداوەكە كوشتنی ئەو ژنە بەهۆی لە دەست دەرچوونی گوللـە بووە لەلایەن كەسێك بە ناوی ( ا ،ت ، ج)  كە لە كاتی دەستكاریكردنی دەمانچەكەی لە دەستی دەرچووە و بەرسینگی ژنەكە كەوتووە دەست بە جێ گیانی لە دەستداوە".

شێروان خالید ئاماژەی بۆ ئەوەشکرد، ژنەکە لە ماڵی تۆمەتبارەكە كوژراوە كە بە ئیش چۆتە ئەو ماڵە و دراوسێ ی یەكتر بوونە، دوای ڕووداوەكەش تۆمەتبار خۆی ڕادەستی پۆلیس كردووە و دانی ناوە بەوەی بە هەڵە لێیداوە، لێكۆڵینەوەش لە ڕووداوەكە بەردەوامە .

 ب.ش