سەیدسادق، ڕژاک بۆ ٨ی ئازار گوڵی پێشکەشی ژنان کرد

ڕێکخراوی ژنانی ئازادی کوردستان، بۆ پیرۆزکردنی ٨ی ئازار ڕۆژی جیهانی ژنان، گوڵی پێشکەشی ژنانی سەیدسادق کرد، دەشڵێن: هەموو ڕۆژەکانی ساڵ دەکەینە ٨ی ئازار.


ئەمڕۆ ئەندامانی ڕژاک، لەسەر پردی ناوبازاڕی شارۆچکەی سەیدسادق-ی سەر بە پارێزگای سلێمانی، دەستیان بە پێشکەشکردنی گوڵکرد بە ژنانی سەیدسادق و پیرۆزبایی ٨ی ئازاریان لێکردن.

كەژاڵ ئەحمەد، بەیاننامامەی ڕێكخراوی ژنانی ئازادی كوردستانی خوێندەوە، کە تێکدا هاتبوو: ٨ی ئازار ڕۆژی ئاشتی و بەرخۆدانە، لەسەر ناوی ڕێكخراوی ژنانی ئازادی كوردستان، بەتایبەت ژنانی شۆڕشگێڕ و چالاكوان لە كوردستان و هەموو جیهان ٨ی ئازار پیرۆز دەكەین.

لە درێژەی ڕاگەیەندراوەکەدا هاتبوو: ئاشكرایە پرسی ژن پرسێكی جیهانیە، ناتوانرێت بەوڵاتێك یان هەرێمێك سنوورداربكرێت، لەهەمان كاتدا كێشیەكی مرۆڤایەتیە، تەواوی كێشەو ئاڵۆزییەكان ناوەندەكەی كێشەی ژنە، تەمەنێكی درێژی كۆمەڵگای مرۆڤایەتی خاوەنی كێشەیەكی بەم شێوە نەبووە، چونكە كۆمەڵگا بوون و گشت داهێنەرەكانی مرۆڤایەتی لەسەر دەستی ژن پێشدەكەوێت، لەسایەی پێشەگایەتی ژناندا هەموو مرۆڤایەتی بەئاشتەوای و دیموكراسیی و یەكسانی ژیان دەكەن.

لەكۆتای بەیاننامەكەشیاندا هاتبوو: وەك ڕێكخراوی ژنانی ئازادی كوردستان، بەدروشمی تێكۆشانی ژنان بەرخۆدانە، خۆبونە، ئازادییە، بەچالاكی جۆراو جۆر یادەكە پیرۆز دەكەین، لەهەمان كاتدا تەواوی ڕۆژانی ساڵ دەكەینە ٨ مارس، ڕوبەڕووی هەموو جۆرە توندوتیژی و دەست درێژییەكان دەبینەوە، ڕۆژانی تێكۆشان و بەرخۆدان و ڕۆژی ئاشتی و جەژنە، چونكە چەندێك تێكۆشین ئەوەندەش ئازاد دەبین و دەبینە خاوەن ناسنامەی سەربەخۆی ژنان.

د.ع