شاندی ژنانی باكور و ڕۆژهەڵاتی سوریا لەگەڵ ژنانی كۆمەڵی ئیسلامی كوردستان كۆبوونەوە

دوای كۆبوونەوەیان لەگەڵ ژنانی زەحمەتکێشانی کوردستان، شاندی ژنانی باکورو ڕۆژهەڵاتی سوریا لەگەڵ ڕێکخراوی خوشکانی ئیسلامی سەربە کۆمەڵی ئیسلامی کوردستان کۆبوونەوە.


شاندێك لە ژنانی باكور و ڕۆژهەڵاتی سوریا دوو ڕۆژە لە باشوری كوردستانن، دواینیوەڕۆی ئەمڕۆ لە شاری هەولێر لەگەڵ ڕێكخراوی خوشكانی ئیسلامی كوردستان سەربە كۆمەلی ئیسلامی كوردستان كۆبوونەوە.


شاندەكە، پێكهاتووە لە ئاسیا عەبدوڵا ئەندامی كۆردیناسیۆنی كۆنگرەی ستار، ئەستێرە قاسم چالاكوانی كۆمەڵگەی مەدەنیی، نارین مەتین سەرۆكی شەپۆلی پێشەڕۆژی كوردستان و شیراز حەمۆ هاوسەرۆكی ئەنجومەنی خۆبەڕێوەبەریی هەرێمی عەفرین بە هاوڕێیەتی جیهان خەلیل، نوێنەری كۆنگرەی ستار لە باشوری كوردستان.

ئەستێرە قاسم چالاكوانی كۆمەڵگەی مەدەنی، وتی: سەردانی ژنانی كۆمەڵی ئیسلامی كوردستانمان كردووە بۆ ئەوەی لە نزیكەوە پرسی سێیەمین كۆنفرانسی ژنانی كوردستان گفتوگۆبکەین، هەروەها بەردەوامیدان بە بڕیاری كۆنفرانسەكانی ڕابردوو، كە لە ئامەد و هەولێر بەڕێوەچوون تاوتوێكران.

لای خۆشیەوە قومرییە بەرزنجی سەرۆكی لقی هەولێری خوشكانی كۆمەڵی ئیسلامی كوردستان ڕایگەیاند: لەگەڵ ئەوەی ئێمە وەكو رێكخراوەكەمان ئەندامین لە كۆنگرەكە بەڵام بە هەموو شێوەیەك پاڵپشت وهاوكار دەبین بۆ سەرخستنی كۆنگرەكە.

وتیشی: هەبوونی كۆنفراسێکی لەم شێوەیە هەبوونی پاڵپشتی ژنانە لە نێوخۆیاندا گرینگی و تایبەتمەندی خۆی دەبێت و دەبێتە پاڵپشتیەكی بەهێزیش بۆ ژنان بۆ بەرگریكردن لە ماف و داخوازیەكانی ژنان لە تەواوی پارچەكانی كوردستان.

ب.ش