"كارمەندانی بەرەنگاربونەوەی توندوتیژی دژ بە ژنان پێویستیان بە هۆشیارییە"

ئەنجامی ڕاپرسییەک دەریدەخات كارمەندانی بەڕێوەبەرایەتییەكانی بەرەنگاربونەوەی توندوتیژی دژ بە ژنان لە هەرێمی كوردستان، پێویستیان بە هۆشیاری زیاتر هەیە، ڕاپرسیەکە دەریشیدەخات کە بوونی ئەو بەڕێوەبەرایەتییانە گرنگە.


ئەمڕۆ لە سمینارێكدا کە لەهەولێر بەڕێوەچوو، ئەنجامی ڕاپرسییەك ئاشكرا، كە تایبەت بوو بە هەڵسەنگاندنی كارو چالاكییەكانی بەرێوبەرایەتییەكانی بەرەنگاربونەوەی توندوتیژی دژ بە ژنان و بەپێی ڕاپرسییەکە بوونی ئەو بەڕێوەبەرایەتیانە بە گرنگ و پێویست دادەنرێت.

سیمینارەكە لەلایەن هەردوو توێژەر (سامان حەسەن و دومینا ماندەت) پێشكەشكرا و تایبەت بوو بە هەڵسەنگاندنی كاروچالاكییەكانی بەڕێوەبەرایەتییەكانی بەرەنگاربونەوەی توندوتیژی دژ بە ژنان، ناوەڕۆكی سیمینارەكەش ئەنجامی توێژینەوەیەك بوو، لەسەر کارەکانی بەڕێوەبەرایەتییەكانی بەرەنگاربونەوەی توندوتیژی دژی ژنان لە هەرێمی كوردستان، لە ئەنجامی رَاپرسیەكە دەردەكەوێت كە هەبوونی بەڕێوەبەرایەتیەكانی توندوتیژی دژی ژنان لە هەرێمی كوردستان گرنگ و پێویستە.

لەبەشێکی تری ڕاپرسیەكەداهاتووە كارمەندەكانی ئەو بەڕێوەبەرایەتییانە پێویستیان بە هۆشیاری زیاتر هەیە بۆ ئەوەی لە كاتی لێكۆڵینەوە لە كەیسەكاندا ڕێوشوێنی باشتر بگرنەبەر بۆئەوەی بتوانن كەیسەكان بەشێوەیەكی دروست یەكلایی بكەنەوە .

ڕاپرسیەكە ماوەی سێ مانگی خایەندوە و ١٠٠ كەس بەشداربوون تێیدا و لەسەر سێ ئاست ئەنجامدراوە، ئاستی یەكەم لەنێو كارمەندەكانی بەڕێوەبەرایەتی توندوتیژی بووە، ئاستی دووەم ئەو كەسانە بەشدار بوون كە كەیسیان هەیە لەو بەڕێوەبەرایەتییانە و ئاستی سێهەمیش ئەو دامودەزگایانەی كە ڕۆژانە كارو هەماهەنگییان هەیە لەگەڵ بەڕێوەبەرایەتییەكانی بەرەنگاربونەوەی توندوتیژی دژبە ژنان.

 

ک.س