"كچێكی تەمەن ١٣ ساڵان خۆی خنكاند"

لە شارۆچكەی سۆران، بە وتەی پۆلیس "كچێكی تەمەن ١٣ ساڵان لە چێشتخانەی ماڵەوەیاندا خۆی هەڵواسی وەو گیانی لە دەستداوە".


نیوەڕۆی ئەمڕۆ لە شارۆچكەی سۆرانی سەر بە پارێزگای هەولێر، كچێكی تەمەن ١٣ساڵ لە ماڵەكەی خۆیاندا خنکا، پۆلیسیش دەڵێت "خۆی خۆی هەڵواسی و گیانی لە دەستدا".

شێروان خالید وتەبێژی بەڕێوەبەرایەتی بەرەنگاربوونەوەی توند و تیژی دژ بە ئافرەتان لە سۆران بە ڕۆژنیوزی ڕاگەیاند:" نیوەڕۆی ئەمڕۆ لە لایەن نەخۆشخانەی فریاكەوتنی سۆران ئاگاداركراینەوە بە بوونی تەرمێك، دوای لێكۆڵینەوەمان دەركەوت كچێك  كە ناوی (پ،م،م) تەمەن 13 ساڵانە و دانیشتووی سۆرانە خۆی خنكاندووە".

شێروان خالید وتیشی، "ڕووداوەكە  لە ژووی چێشتخانەی ماڵەوەی ئەو كچە بووە كە بە پێی لێكۆڵینەوەكان ئەو كچە بە لەچك خۆی بە هەڵواسیوە و گیانی لە دەستداوە".

وتەبێژی بەرەنگاربوونەوەی توند و تیژی دژ بە ئافرەتان لە سۆران ڕاشیگەیاند:"ئەگەرچی وتەی كەسوكارەكەی وەرگیراوە، بەڵام لە ئێستادا هۆكارەكەی تەواوی  نازانرێت، پەڕاوی لێكۆڵینەوەش بۆ ڕووداوەكە كراوەتەوە و بەدواداچوونی زیاتر بۆ ڕووداوەكە دەكرێت".

د.ح