لەیلا گوڤەن ٥٨ ڕۆژە مانی لە خواردن گرتووە

لەیلا گوڤەن ماوەی ٥٨ ڕۆژە دژی گۆشەگیریی سەر ئۆجالان مانی لە خواردن گرتووە و ژووری پارێزه‌رانی ئامه‌دیش ڕایگەیاند، بارودۆخی له‌یلا مه‌ترسیداره‌، چونکە ویستویانە سه‌ردانی بکەن‌ و چاویان پێی بکەوێت، به‌ڵام به‌هۆی خراپی باری ته‌ندرووستییه‌وه‌ نه‌یتوانیوه‌ بچێته‌ دیده‌نییان.


ژووری پارێزه‌رانی ئامه‌د ده‌رباره‌ی بارودۆخی له‌یلا گوڤه‌ن په‌رله‌مانتاری پارتیی دیموکراتیی گه‌لان (هه‌ده‌په‌) و هاوسه‌رۆکی کۆنگره‌ی کۆمه‌ڵگه‌ی دیموکراتی (که‌جه‌ده‌) که‌ ٥٨ ڕۆژه‌ دژی گۆشه‌گیریی سه‌ر ئۆجالان له‌ زیندان مانی له‌ خواردن گرتووه‌، کۆنگرەیەکی ڕۆژنامه‌نووسیان ساز کرد.

سه‌رۆکی ژووری پارێزه‌رانی ئامه‌د جیهان ئایدن ڕایگه‌یاند، له‌ ٢٠ی تشرینی دووه‌می ٢٠١٨ خۆی، له‌ ٢٣ی کانوونی یه‌که‌می ٢٠١٨دا جێگری سه‌رۆکی ژووری پارێزه‌رانی ئامه‌د بایرام کۆلوومان و له‌ ٣٠ی کانوونی یه‌که‌می ٢٠١٨شدا ئه‌ندامی ده‌سته‌ی به‌ڕێوه‌به‌ری ژووری پارێزه‌رانی ئامه‌د که‌زیبان یڵماز سه‌ردانی له‌یلا گوڤه‌نیان کردووه‌ له‌ زیندان.

ئایدن ئاماژه‌ی بۆ ئه‌وه‌ کرد،: ٣٠ی کانوونی یه‌که‌م نوێنه‌رێکمان سه‌ردانی گوڤه‌نی کرد له‌ زیندان، به‌ڵام به‌هۆی ئه‌وه‌ی باری ته‌ندرووستی تێکچووه‌، گوڤه‌ن نه‌یتوانیوه‌ چاوی پێبکه‌وێت، به‌و هۆیه‌وه‌ له‌گه‌ڵ ئه‌و زیندانییانه‌ چاوپێکه‌وتنمان کردووه‌ که‌ له‌ هه‌مان ژووری له‌یلا گیوڤه‌ن ده‌مێننه‌وه‌، به‌ گوێره‌ی ئه‌و زانیارییانه‌ی ئه‌وان پێیان داوین؛ گیوڤه‌ن کێشی زۆر دابه‌زیوه‌، تووشی هه‌ستیاریی ده‌نگ و ڕووناکی بووه‌، ئازاری سه‌ری په‌یدا بووه‌، له‌ ڕۆیشتن و قسه‌کردندا زه‌حمه‌تی زۆر ده‌کێشێت و حاڵی خراپه‌، ئه‌مه‌ ده‌ریده‌خات که‌ له‌ ڕۆژی ٥٧هه‌می مانگرتنه‌که‌یدا، مه‌ترسی له‌سه‌ر ته‌ندرووستیی گیوڤه‌ن دروست بووه‌."

"مانگرتنه‌کان به‌رفره‌وان ده‌بن"

سه‌رۆکی ژووری پارێزه‌رانی ئامه‌د وتی، له‌پێناو ئه‌وه‌ی گۆشه‌گیریی سه‌ر ئۆجالان هه‌ڵبگیرێت، له‌یلا گوڤه‌ن ده‌ستی به‌ مانگرتن له‌ خواردن کردووه‌ و مانگرتنه‌کانیش به‌فره‌وان بوون. وتیشی، له‌ زیندانه‌کان ڕێز له‌ مانگرتوان ناگیرێت و به‌پێی پێویست شه‌کر، خوێ و ڤیتامین به‌ زیندانییه‌کان نادرێت.

"ده‌بێ چاوپێکه‌وتن له‌گه‌ڵ ئۆجالان بکرێت"

جیهان ئایدن ڕایگه‌یاند: "ئێمه‌ وه‌ک ژووری پارێزه‌رانی ئامه‌د ڕایده‌گه‌یه‌نین، به‌ڕێز عه‌بدوڵا ئۆجالان و ٣ زیندانییه‌که‌ی دیکه‌ی هه‌مان زیندان مافی ئه‌وه‌یان هه‌یه‌ له‌گه‌ڵ خانه‌واده‌ و پارێزه‌ره‌کانیان دیدار ساز بکه‌ن، مافی دیدار له‌گه‌ڵ پارێزه‌ر له‌ په‌یمانه ‌نێوده‌وڵه‌تییه‌کاندا چه‌سپێنراوه‌ و ده‌بێ له‌ به‌رانبه‌ر به‌ڕێز ئۆجالان و هه‌موو زیندانییان جێبه‌جێ بکرێت، بۆ ئه‌وه‌ی ژیانی له‌یلا گوڤه‌ن و زیندانییانی دیکه‌ نه‌که‌وێته‌ مه‌ترسییه‌وه‌، پێویسته‌ ده‌ست له‌و سیاسه‌ته‌ به‌ربدرێت، ئێمه‌ داوا له‌ وه‌زاره‌تی داد و هه‌موو فه‌رمانگه‌کانی سه‌ر به‌و وه‌زاره‌ته‌ ده‌که‌ین که‌ به‌ گوێره‌ی قانوون و په‌یماننامه‌ نێوده‌وڵه‌تییه‌کان مامه‌ڵه‌ بکه‌ن."

 

ک.ک