لە سلێمانی گفتوگۆ لەبارەی گرفتەكانی ژنان لە كۆمەڵگادا كرا

لە چوارچێوەی زنجیرە چالاكییەكی پرۆژەی (بەدیهێنانی ژینگەیەكی گونجاو بۆ ژنان لە ژیانی گشتییدا لە عێراق و هەرێمی كوردستان) كە لەلایەن ڕێكخراوی دابین-ەوە ئەنجامدەدرێت، لە شاری سلێمانی گفتوگۆیەكی كراوە بۆ تاوتوێكردنی گرفتەكانی ژنان لە كۆمەڵگادا ڕێكخرا.


ئێوارەی ئەمڕۆ لە هۆتێل هایكریست-ی شاری سلێمانی، ڕێكخراوی دابین بەهاوكاری ڕێكخراوی NEDی ئەمریكی، گفتوگۆیەكی كراوەیان سەبارەت بە كێشەكانی ژنان لە كۆمەڵگادا ڕێكخست.

لە گفتوگۆ كراوەكەدا، ژمارەیەك لە ژنانی چالاكوان و یاسا ناسان ئامادەیبوون تێیدا گفتوگۆ لەسەر ئاستەكانی چۆنییەتی خزمەتكردنی حكومەت بە تواناكانی ژنان، دابینكردنی خزمەتگوزارییە هەمە چەشنەكان بۆ ژنان، ڕەخساندنی دەرفەت بۆ بەرجەستەكردنی تواناكانی ژنان و كێشە ئابوورییەكانی ژنان كرا.

بەشداربووان لە خستنەڕووی ڕاو و سەرنجەكانیاندا، ئاماژەیان بەوەكرد، كە پێویستە حكومەت پشتگیریی لە ژنان بكات و دەرفەتیان بۆ بڕەخسێنێت تا بتوانن ڕۆڵی خۆیان بەرجەستە بكەن و لە ناوەندەكانی بڕیاردا جێ بگرن.

هەروەها بەپێویستیش زانرا، كە حكومەت سەرجەم پێداویستییەكان بۆ ژنان دابینبكات تاوەكو بتوانن ڕۆڵ بگێڕن لە پرسەكاندا، هێماش بۆ ئەوەكرا، كە دەبێت زیاتر كار بۆ پێشخستنی هۆشیاریی ژنان بكرێت و بە ئەرك و مافەكانی خۆیان ئاشنابكرێن.

لە ئەنجامی گفتوگۆكەشدا، چەند گروپێكی تایبەت لەناو بەشداربوواندا پێكهێندرا بۆ كاركردن و بەدواداچوون بۆ پرسەكانی ژنان.

د.ح