هەولێر، لە بارەی كەیسی سێوانەوە چەند داوایەك ئاراستەی دەسەڵاتدارانی هەرێم کرا

لە بارەی كەیسی سوتانی سێوان قادرەوە گروپێك لە چینوتوێژە جیاوازەكانی شاری هەولێر، داوایەك ئاراستەی  حكومەت و پەرلەمانی هەرێم دەكەن، تێیدا داوای بە لاڕێدانەبردنی کەیسەکە دەکەن و چەند خاڵێک دەخەنەڕوو، لەخالەکانیشدا هۆشداری دەربارەی دراما بیانییەکان و مەترسییەکانی دراوە.


ئەمرۆ لە هوتێل چوارچرای شاری هەولێر، گروپێك كە پێكهاتوون لە چالاكوانی ژنان، كەسایەتی یاسایی و نوێنەری ژمارەیەك لە دامەزراوە حكومییەکان، بۆ شەرمەزارکردنی سوتانی سێوان و منداڵەکانی و قوربانیانی دیکەی توندوتیژی، لە کۆنگرەیەکی ڕۆژنامەنووسیدا بەیاننامەیەکیان ئاراستەی دەسەڵاتدارانی هەرێمی کوردستان کرد.

لە کۆنگرەکەدا لەنجە عەبدوڵا، چالاكوانی ژنان بەیاننامەکەی خوێندەوە و تێیدا هاتبوو: وەك ئاشكرایە بارودۆخی ژنان لە هەرێمی كوردستان لە ئاستێكی مەترسیداردایە و سەرەرای هەبوونی چەندین یاساو دامەزراوەی تایبەت بۆ ڕووبەڕووبوونەی دیاردەكانی توندوتیژی، بەداخەوە تاكو ئێستا ڕۆژانە گوێبستی هەواڵەكانی كوشتنی ژنان دەبین بە شێوازی جیاواز، دواینیان كەیسی سووتاندنی سێوان قادرو منداڵەكانی بوو لە شارۆچكەی چەمچەماڵ، كە بەشێوازێكی دڕاندانەو دوور لە ویژدان و هەستی مرۆڤایەتی ئەنجامدرا.

هەروەها هاتبوو: ئێمە وەكو ژمارەیەك لە چالاكوانانی ژنان و كۆمەڵی مەدەنی و كەسایەتی یاساییی، بەمەبەستی ئیدانەكردنی كەیسی سێوان قادرو منداڵەكانی و هەموو ئەو كەیسانەش كە پێشتر روویانداوە و بۆ دانانی سنوورێك بۆ ئەم ڕەشەكوژییەی دەرهەق بە ژنان دەكرێت، چەند داواكارییەك دەخەینەڕوو بۆ بەرچاوی دەسەڵاتدارانی هەرێم.

١-داواكاریین كەیسی سێوان قادرو منداڵەكانی رێكاری یاساییی خۆی وەربگرێت و هیچ دەستێوەردانێكی دەرەكی لە دەرەوەی دەسەڵاتی یاسا نەیگرێتەوەو رێگا نەدرێت سوڵحی عەشیایەری و دەستێوەردانی حزبی ئەم كەیسە بەلاڕێدابرێت و تاوانباران سزای توند بدرێن.

٢-داوادەكەین لە حكومەت و لایەنی پەیوەندیدار سنوورێك بۆ دیاردەی چەكداری دابنێت و بە یاسا چەكەكەكان لە نێوماڵاندا قەدەغەبكرێن، بۆ پاراستنی سەلامەتی خێزان و گیانی ژنان بەتایبەتی، چونكە ئەم ئامرازە یەكێكە لە هۆكارەكانی كوشتنی ژنان بە پاساوی جیاواز.

٣- کەناڵەكانی میدیا لە هەرێمی كوردستان لە كاتی ڕووماڵكردنی بابەتەكانی توندوتیژی بە هەستیاری و لە چوارچێوەی پرەنسیپ و ئەخلاقیاتی كاری ڕۆژنامەوانی مامەڵە بكەن، بەدواداچوونیان هەبێت بۆ ئەنجامی لێكۆلینەوەكان و بڵاوكردنەوەی بۆ ڕای گشتی.

٤-دانانی سنوورێك  بۆ كەناڵە تەلەفزیۆنییەكان لە پەخشكردنی دراماو فیلمە بیانییەكان، كە كلتووری توندوتیژی بڵاودەكاتەوە .

٥-داواكارین لە كابینەی داهاتووی حكومەت، ستراتیژو پلانێكی تۆكمەو بەهێزی هەبێت بۆ كاركردن لەسەر پرسی ژن لە هەموو ئاستەكاندا و پرسی ژن ببێت بە یەكێك لە ئەولەویەتەكانی كاری ئەو كابینەیە.

س.ح