هەڵەبجە، نەبوونی بەڕێوەبەرایەتیی بەرەنگاربوونەوەی توندوتیژیی نیگەرانیی لێدەکەوێتەوە

نەکردنەوەی بەڕێوبەرایەتیی بەرنگاربوونەوەی توندوتیژیی دژ بە ژنان لە هەڵەبجە نیگەرانیی ژنانی بەدوای خۆیدا هێناوە و جێگری پارێزگاری هەڵەبجەش دەڵێت: لە ئایندەیەکی نزیکدا دەکرێتەوە.


هەرچەندە ڕۆژی ٢٥ی تشرینی دووەمی ساڵی ڕابردوو،  ئازاد تۆفیق، پارێزگاری هەڵەبجە، لە کۆنگرەیەکی ڕۆژنامەنووسییدا ڕایگەیاند"فەرمانی كردنەوەی بەڕێوەبەرایەتیی بەرەنگاربوونەوەی توندوتیژی دژ بە ژنان لە هەڵەبجە دەرچووە، تەنها چەند ڕێكاری تایبەت بە دابینكردنی بینا و ستافی بەڕێوەبردن ماون و لە ئایندەیەكی نزیكدا ئەو بەڕێوەبەرایەتیە دەكرێتەوە"، بەڵام هەتا ئێستا بەڕێوبەرایەتییەکە نەکراوەتەوە.

شۆخان حەمەڕەشید، بەڕێوبەری ڕێكخراوی هاریكاری یاسایی ژنان، نیگەرانیی خۆی لە نەکردنەوەی بەڕێوبەرایەتییەکە نیشاندا و وتی:"كۆمەڵێك بەڕێوەبەرایەتی گرنگ لەهەڵەبجەدا بوونی نیە، لەوانەش بەڕێوەبەرایەتی تایبەت بەكێشە خێزانیەكان، بۆیە ساڵی ڕابردوو كەمپینی فراوانمان ئەنجامدا بۆ كردنەوەی ئەو بەڕێوەبەرایەتیە لەهەڵەبجەدا، لەئێستادا بڕیاری كردنەوەی دراوە، بەڵام شوێن و بینای بۆ دیاری نەكراوە".

بەهۆی نەبوونی بەڕێوبەرایەتییەکەوە لە پارێزگای هەڵەبجە، تا ئێستا ئامارێکی فەرمیی توندوتیژییەکانی دژ بە ژنان لەو سنوورەدا نییە و لەکاتی ڕووبەڕووبوونەوەی توندوتیژییدا ژنان نازانن پەنا بۆ کوێ ببەن و سکاڵایان بگەیەننە لای کێ.

لەوبارەیەوە، كاوە عەلی، جێگری پارێزگاری هەڵەبجە، بە ڕۆژنیوز-ی ڕاگەیاند: كردنەوەی بەڕێوەبەرایەتی بەرنگاربوونەوەی توندوتیژی دژ بەژنان چەند مانگێكە فەرمانی بۆ دەرچووە، ئێستا بەڕێوەبەرەكەیمان ڕاسپاردوە و لەناو هەڵەبجەدا بینایەك هەڵبژێرێت، هەر كاتێك بینایەكی دەستنیشانكرد، ئێمەش لەگەڵ لایەنی پەیوەندیدار قسەدەكەین، بۆ دابینكردنی بیناكە بۆیان، لەئایندەیەكی نزیكیشدا شوێن بۆ ئەو بەڕێوەبەرایەتیە دابین دەكرێت و دەكرێتەوە.

وتیشی: بوونی ئەو بەڕێوەبەرایەتییە زۆر پێویستە بۆ هەموو پارێزگایەك  و بەتایبەتیش هەڵەبجە، بەمەبەستی ڕێكخستنەوە و كەمكردنەوەی ئەو حاڵەتە توندوتیژیانەی لەناوچەكەدا ڕوودەدەن.

بەپێی ئەو ئامارە نافەرمییانەی دەست ڕۆژنیوز كەوتوون، ساڵی ٢٠١٧ لە هەڵەبجە ٥٥ حاڵەتی توندوتیژیی دژبەژنان هەبووە، كە زۆرترینیان لێدان و هەڕەشەكردنی دەركردنی ژنان بووە لەلایەن هاوسەرەکانیانەوە، هەروەها یەك حاڵەتی كوشتنی ژنانیش تۆماركراوە، ساڵی ٢٠١٨-ش ئامارەكە بەرزبووەتەوە بۆ ٦٧حاڵەتی توندوتیژیی، كە بێجگە لە حاڵەتێکی خۆ کوشتن لەڕێگای خۆسوتاندنەوە، توندوتیژییەكان زیاتر لێدان و دەركردنی ژنان بووە لەلایەن پیاوانەوە.

 

ش.ف