پێنج ژن کە ڕزگاربوون لە تاوانی ئەنفال ڕێزیان لێنرا

له‌ شارۆچكه‌ی كه‌لار، مه‌دالیای زێڕینی كارین، به‌خشرایه‌ پێنج دایك، کە لە تاوانی ئەنفال ڕزگاریان بووەو توانیویانە نەوەکانیان سەربەرزانە پەروەردە بکەن.


ئه‌مڕۆ، له‌ هۆڵی وه‌رزش و لاوانی گه‌رمیان، به‌ چاودێری ئیداره‌ی گه‌رمیان و قائیمقامی شارۆچكه‌ی كه‌لار و بەشداربوونی هاوڵاتییەکی بەرچاو، مه‌راسیمی خه‌ڵاتی زێڕینی كارین، به‌رێوه‌چوو.

سه‌ره‌تایی ده‌ستپێكردنی مه‌راسیمه‌كه‌، به وه‌ستان بۆ ڕێزلینان له‌ شه‌هیدان ده‌ستیپێكرد، دواتر، وتاری ئیداره‌ی گه‌رمیان، كارین مۆدلۆخ، كۆمه‌ڵه‌ی داكۆكیكار له‌ كه‌سوكاری قوربانیانی ئه‌نفال و لیژنه‌ی ئاماده‌كاری خه‌ڵات، پێشكه‌شكران .

دواتر لەپای ماندووبوونیاندا، پێنج دایك، کە لە تاوانی ئه‌نفال ڕزگاریان بووە و دوای تاوانەکە منداڵه‌كانیان سەربەرزانە گەورەو پەروەردەکردووە، خه‌ڵاتی زێڕینی كارین-یان پێبه‌خشرا.

مەراسیمەکە لەلایەن ڕێكخراوی 'هاوكاری'ی ئه‌ڵمانییەوە بەڕێوەدەبرا، کە له‌ ساڵی ١٩٩٥وە باره‌گای له‌ شاری سلێمانی كردوه‌ته‌وه‌ و لقێكی له‌ شارۆچكه‌ی كفرییە، ئه‌مه‌ دووه‌م ساڵه‌ له‌سه‌ریه‌ك به‌بیرۆكه‌ی 'مام پۆڵا'، ئەم ڕێزلێنانه‌ له‌ كه‌سوكاری ئه‌نفالكراوه‌كان پێشکەش دەکرێت، ساڵی پار له‌ شارۆچكه‌ی كفری مه‌راسیمی به‌خشینی ئه‌و مه‌دالیا ئالتونیه‌ی ئه‌نجامدرا و ئه‌مساڵ له‌ كه‌لار.

'خەڵاتی کارین'، كارین مۆدلۆخ، له  ساڵی ١٩٩١ هاتووەته‌ باشوری كوردستان و كاری مرۆزیی بۆ کەسوکاری ئه‌نفالكراوه‌كان ئەنجام داوە، له‌به‌رامبه‌ر ئه‌و هه‌وڵانهدا‌ ناوی ڕێزلێنانه‌كه‌ نراوە، بە خه‌ڵاتی خاتوو كارین.

س.ح