پەیكەری عادیلە خانم نۆژەن دەكرێتەوە

ماوەی ساڵێكە لوتی پەیكەری ژنە تێكۆشەری كورد عادیلەخانم لەناو باخی گشتی هەڵەبجە شكێنراوە و تا ئێستا نۆژەن نەکراوەتەوە، سەرۆکی شارەوانی هەڵەبجەش دەڵێت :بەهۆی نەبوونی بودجەوە تائێستا پەیکەرەکەیان چاک نەکردوەتەوە و دوای جەژنی ڕەمەزان پەیكەرەكە نۆژەن دەكەنەوە.


پەیكەری عادیلەخانم، ساڵی ٢٠٠٧ لەلایەن هونەرمەندی پەیكەرساز زاهیر سدیق، بە بڕی ٢٧ ملیۆن دینار لەناو باخی گشتی شاری هەڵەبجە دروستكراوە، بەڵام ماوەی ساڵێکە لوتی پەیکەرەکە شکێنراوە، جگە لەوەش چەندین پەیکەری دیکەی ئەو شارە لە لایەن کەسانی نەناسراوەوە شکێنراوە، لەوانەش پەیكەری دانیاڵ میتەران، کە بەتەواویی شكێنرا، دواتر جارێكی دیكە پەیكەرەكە لەناو باخچەی سەرۆكایەتی شارەوانی هەڵەبجە دروستكرایەوە، بۆ ئەوەی زیانی پێنەگات و نەشكێنرێتەوە، ڕۆژنیوز، لەو بارەیەوە ئەم بەدواداچوونەی کردووە.

سەباح محەمەد، هاوڵاتییەكی پارێزگای هەڵەبجەیە و لە بارەی شکاندنی پەیکەرەکانی شارەکەی وتی: "بەڕاستی جێگەی داخە لەم سەردەمەدا بژیت چەند كەسانێك هەبن تائێستاش بەبیرێكی كۆنەوە بیردەكەنەوە پەیكەرەكان دەشكێنن، داواكارم لەدایك و باوكان كاتێك منداڵەكانیان دێنەدەرەوە ئاگایان لێیان بێت، چونكە گەنجەكان كاتێك دێنە پارك و شوێنە گشتیەكان دارەكان دەشكێننەوە و زیانی پێدەگەیەنن".

وتیشی: دەبینین پەیكەریی ژنە تێكۆشەری كورد عادیلە خانم كە مێژوویەكی پڕخەباتی هەیە لەكاتی خۆیدا توانیویەتی خزمەتی هەڵەبجە بكات، بەڵام بەداخەوە لەبری ئەوەی ڕێزی لێبگیرێت پەیكەرەكەی لوتی شكێنراوە و بەشێكی تێكدراوە، ئەوانەشی ئەو كارە دەكەن كەسانێكی گێرەشێوێنن و شكاندنی پەیکەر دیاردەیەكی ناشیرینە."

كوێستان ئەكرەم، سەرۆكی شارەوانی پارێزگای هەڵەبجە، لەبارەی شکاندنی پەیکەرەکان و هۆکاری نەپاراستنیان و چاککردنەوەی پەیکەرەکان، وتی: "ناكرێت هەر پەیكەرە و چاودێرێكی بۆ دابنێین بۆ ئەوەی هیچی لێنەكەن، هەندێك لەو گەنجانەی ئەو كارە دەكەن مێردمنداڵن تێگەیشتنێکی تەواویان نیە، بەشێوەیەكی باشیش پەروەردە نەكراون بۆ ژیان، كاتێكیش دێنە دەرەوە زیان بەدارودرەخت و باخچە و پەیكەرەكان دەگەیەنن، وتیشی: بەشێكی كەمی پەیكەری عادیلەخانم شكێنراوە، لەئایندەیەكی نزیكدا چاكی دەكەینەوە.

باسی لەوەشكرد، تەنها دوو پەیكەری ژن و پەیکەری نزا کە هێمایەکە بۆ ژنان لەناو پارێزگای هەڵەبجە هەیە، دوو پەیکەرەکەی دیکەش یەكێك لەوانە عادیلەخانمە و ئەوی دیكەیان خاتوو دانیاڵ میتەرانە كە "بەدایكی كوردان ناسراوە" یەكێك بووە لەو ژنانەی لەكاتی كۆڕەوی ساڵی ١٩٩١ هاوكاری زۆری كوردی كردوە، بەتایبەتیش هاتووەتە هەڵەبجە و سەردانی شارەكەی كردوە.

سەرۆكی شارەوانی ئاماژەی بەوەشكرد، پەیكەرشكاندن وەك دیاردەی لێنەهاتووە لەناو پارێزگای هەڵەبجە، تەنها ژمارەیەک مێردمنداڵ زیاتریش بەشەودا ئەو کارە دەکەن، زۆرجاریش بەهۆی خواردنەوەی مەیەوە ئاگایان لەخۆیان نامێنێ‌ و ئەوكارانە دەكەن، شكاندن و تێكدانی پەیكەرەكان حاڵەتێكی تایبەت یان بەئەنقەست نیە.

لای خۆیەوە ڕائیدی پۆلیس بەرزان عوسمان، وتەبێژی بەڕێوەبەرایەتی پۆلیسی پارێزگای هەڵەبجە، بە ڕۆژنیوزی ڕاگەیاند، لەساڵی ڕابردوو شكاندنی پەیكەری مامۆستای گەورە و وەستا ئەنوەر لەلایەن هاوڵاتیەكەوە لەپارێزگای هەڵەبجە ڕوویاندا، پاش ڕووداوەكە لەلایەن هێزەكانی پۆلیسەوە تۆمەتباری ڕووداوەكەمان دەستگیركرد"

وتیشی "پاش دەستگیركردنی تۆمەتبارەكە دامان بەدادگا و پەڕاوی لێكۆڵینەوەوەمان بۆ كردەوە، دواتر درا بەلیژنەی پزیشكی لەلایەن لیژنەكەوە پێمان ڕاگەیاندرا كەسەكە نەخۆشی دەروونی هەیە و بەرپرس نیە لەو كارانەی ئەنجامی دەدات، بۆیە ئازادكرا دادەوەر بڕیاریداوە لەنەخۆشخانەی دەروونی چارەسەری بۆ بكرێت، خۆشبەختانەش پەیكەرەكان چاكراونەتەوە لەشوێنی خۆیان دانراونەتەوە"

سەبارەت بەتێكدانی بەشێك لەپەیكەری عادیلەخانم وتەبێژەكەی پۆلیس وتی "ئەو دەنگۆیانەی بڵاوبونەتەوە گوایە پەیكەری عادیلەخانم بەشێكی تێكدراوە، ئاگاداری شارەوانی دەكەین بەدواداچوون بۆ ئەو بابەتە بكات، ئێمەش وەك پۆلیس بەدواداچوونی خۆمانی بۆ دەكەین، هەركەسێك سكاڵا تۆمار بكات پەڕاوی لێكۆڵینەوەی بۆ ڕێكدەخەین بۆ دۆزینەوەی كەسانی تاوانبار."

ک.س