چالاکوانێکی ژنان: توندوتیژییەكی بێ‌ دەنگ لە هەڵەبجەدا هەیە

لەپارێزگای هەڵەبجە، کۆڕبەندێکی تایبەت بەکێشەکانی ژنان بەڕێوەچوو، چالاکوانێکی ژنانیش دەڵێت: "توندوتیژییەكی بێ‌ دەنگ لەهەڵەبجەدا هەیە کە كەس درکی پێ ناكات، ژنانی هەڵەبجە تووشی چەقبەستوویی بوون و هێشتا خەتەنەکردنی مێینە لەم شارەدا بوونی هەیە".


ئەمڕۆ پرۆژەی تکامل (IGPA) کە ئاژانسی ئەمریکی بۆ پەرەپێدانی نێودەوڵەتی پاڵپشتی دارایی دەکات بەهاوکاری ڕێكخراوی هاریكاری یاسایی ژنان، کۆڕبەندێکی تایبەت بە دۆزی ژنانی لە پارێزگای هەڵەبجە ڕێکخست.

 

پانێڵی یەكەمی كۆڕبەندەكە لەژێر ناوی (خستنە ڕووی كێشەو گرفتەكانی ژنان لەپارێزگای هەڵەبجە لەڕووی خزمەتگوزاریی و ئیدارییەوە) بۆ هەریەك لەكۆێستان ئەكرەم، سەرۆكی شارەوانی هەڵەبجە، ئەمەل جەلال، بەرپرسی ئەنجومەنی باڵای كاروباری خانمان، ڕەنگین سەلام چالاكوانی مافەكانی ژنان بەڕێوەچوو.

ڕەنگین سەلام، لەکۆڕبەندەکەدا باسی لەوەکرد: "لەبواری كۆمەڵایەتییەوە كێشەمان زۆرە لەپارێزگای هەڵەبجەدا، بوونی پاركێك یان كافێیەك نەبووەتە كێشەیەك بۆمان، بەڵکو ژنانی هەڵەبجە لەدوای بەپارێزگابوونی شارەكەوە تووشی چەقبەستوویی بوون و بەشداری كارایان نییە لەچالاكیەكاندا، جگە لەوەش لە هەڵەبجەدا ئەگەر حیزبی نەبیت هیچ حسابێكت بۆ ناكرێت".

 

ئاشکراشیکرد: "هەڵەبجە بێ‌ توندوتیژیی نیە و توندوتیژییەكی بێ‌ دەنگ لەم شارەدا هەیە و كەس درکی پێ ناكات، تائێستاش خەتەنەكردنی مێینە لەپارێزگای هەڵەبجەدا بەردەوامە و بوونی هەیە، ئەوەش شتێكی خراپە دەگوزەرێت".

ئەو چالاكوانەی مافەكانی ژنان ئەوەشی وت: "سۆشیال میدیاو ڕاگەیاندن زۆر بەخراپی كاریگەری لەسەر ژنانی هەڵەبجە هەیە، ناوێرین قسەیەك بكەین یەكسەر دەیكەن بەهەڵا لەسەرمان، سۆشیال میدیا بووەتە مۆتەكەی گیانمان، لەگەڵ هەموو ئەوانەدا ژنان خۆشیان لەئاست پێشكەوتنی خۆیان نین خۆخۆرن لەناو خۆیاندا و دەبێت خەمی خۆیان بخۆن".

هەر لە کۆڕبەندەکەدا ئەمەل جەلال، بەرپرسی ئەنجومەنی باڵای كاروباری خانمان، باسی لەوەکرد کە "دەمانەوێت كوردستان خاڵی بكەینەوە لەهەموو جیاكاریی و توندوتیژییەكان، هەموو ئەو شتانەی دەبنە ڕێگر لەبەرەو پێش چوونی ژنان، تەنها باس لەتوندوتیژی و پاراستن ناكەین، بەڵكو باس لەپەرەپێدانی تواناكان و یەكسانی و هەلی كار بۆژنان و خاڵی كردنەوەی ژینگە لە شێوازەكانی توتدوتیژی دەکەین بۆ پێشخستنی بارودۆخی هەرێمی كوردستان ژنان دەبێت ڕۆڵ بگێرن".

ئەمەل جەلال، دوو خاڵیشی وەکو گرفتی سەرەکی بەردەم ژنان خستە ڕوو، "یەكەمیان ئەوەیە ژنان خۆیان وەك پێویست پاڵپشتی یەكتر ناكەن، دەنگیان یەك نیە بۆبەدەستهێنانی مافەكان، خاڵێکی تر ئەوەیە، ژنان دەنگدەری سەرەكین لەکوردستاندا، هیچ حیزبێك ناتوانێت سەركەتوو بێت ئەگەر ژنان نەچنە پرۆسەی دەنگدانەوە، بەڵام كاتێك هەڵبژاردن تەواو دەبێت حیزبەکان مافی تەواوەتی بە ژنان نادەن بێ‌ ئەوەی ژنان دەنگیان لێوەبێت".

ک.س