ڕانیە، ڕێپێوانێک بۆ ڕۆژی جیهانی٢٥ی نۆڤەمبەر بەڕێوەچوو

لە شارۆچکەی ڕانیە، بە دەستپێشخەری ڕێکخراوی ژنانی ئازادی کوردستان، ڕێپێوانێکی جەماوەری بۆ ڕۆژی ٢٥ی نۆڤەمبەر ساڵڕۆژی جیهانی بەرەنگاربوونەوەی توندوتیژی دژی ژنان بەڕێوەچوو.


دوانیوەرۆی ئەمڕۆ کاتژمێر٠٣:٠٠ لە ناو بازاڕی شارۆچکەی ڕانیە-ی ناوەندی ئیدارەی ڕاپەڕین بە دەستپێشخەری رێکخراوی ژنانی ئازادی کوردستان بە دروشمی"لەدژی داگیركاری و ژن كوشتن بێ دەنگی بشكێنە" ڕێپێوانێک بەرێوە چوو.

لە ڕێپێوانەکەدا دروشمەکانی" ژن ‌ژیان ئازادی، ژن ژیانە مەیکوژە، بەلێ بۆ یەکریزی ژنانی کورد، ئێمەی ‌ژنان ‌ ناموسی ‌کەس‌ نین نامووسمان ئازادیمانە، داگیرکاری ھۆکاری ھەموو توندوتیژییەکانە، دوێنێ میرابێڵەکان ئەمرۆ کوردستانیەکان، نا بۆ داگیرکاری لەسەر کوردستان، نا بۆ توندوتیژی لەسەر ژنان، بە تێکۆشانی ژنان رزگار دەبێت کوردستان" بەرزکرابوونەوە.

باڵا عومەر ئەندامی رێکخراوی ژنانی ئازادی کوردستان بەیاننامەی رێکخراوەکەیانی خوێندەوە کە تێیدا هاتووە: ٥٩مین ساڵرۆژی بەرەنگاربوونەوەی توندوتیژی بەرز رادەگرین و سەری رێز ونەوازش لەبەردەم ئەو شەهیدانە دادەنەوێنین كە لەپێاوی ئازادی ژن و ئازادی وڵاتدا گیانی خۆیان بەخت كردووە، هەروەها ئەو كەسانەی لە ئەنجامی توندوتیژی گیانی خۆیان لەدەست داوە بەبیر دەهێنینەوە.

لە بەیاننامەکەدا ئاماژە بە یاساکانی توندوتیژی دژی ژنان کراوەو باس لەوەکراوە، لەهەرێمی كوردستاندا بەهەوڵ و تێكۆشانی رێكخراوەكانی ژنان یاسای باری كەسێتی هەمواركرایەوە و چەندین یاسا بۆ رێگەگرتن لەتوندوتیژییەكان دارێژران بەڵام یاساكان زۆركەم كاریان پێدەكرێت.

باڵا عومەر ئاماژەی بە توندوتیژی لە سنورەکەیان کرد و ڕایگەیاند: هەرێمی راپەرینیش یەكێكە لەو هەرێمانەیە كە زۆرترین قوربانی توندوتیژی هەیە، جگەلەمانە دەستێوەردانەكانی داگیركەرانی كوردستان وەك دەوڵەتی توركیاو ئێران بۆتە مایەی تێكدانی ئاسایشی باشوری كوردستان، وێرای شەرمەزاركردنی تەواوی هێرش وتوندوتیژی و داگیركاریەكانی هەموو دەوڵەتان لە كوردستاندا پشتگیر تەواوی بەرخودانی و تێكۆشانی رۆژئاوای كوردستان دەكەین كە بە پێشەنگایەتی شۆرشی ژناندا بەرێوە دەچێت.

پاشان ئارین کۆبانێ لە سەر ناوی گەنجانی ڕۆژئاوای کوردستان قسەی کرد و ڕایگەیاند: تێكۆشان و سەرهەڵدانی گەلەكەمان لە ناوەراست و باشوری عێراق سڵاو دەكەین و چالاكیەكانیان رەوا دەبینن لەدژی گەندەڵی و نادیموكراتی و دیسان پشگیری خۆمان بۆ هەموو چالاكوانانی خۆپیشداندانەكانی ئێران و رۆژهەڵاتی كوردستان دەردەبرین و بەشداری كارای ژنان وەك گەورەترین هەنگاو دەبینین.

ئارین باسی لەوەشکرد، ئێمەی ژنان بەیەگرتوووی و بە پشتگیری شۆرشی ژنان و گۆرانكاری ریشەیی لەزهنیەتدا دەتواننین لەسەر ئاستی ناوخۆو دەرەوە كۆتایی بەزهنیەتی داگیركاری و توندوتیژی بهێنین و بەرەنگاری هەموو جۆرە توندوتیژییەك ببینەوە.

ب.ش