ڕژاک: دەسەڵاتدارانی باشور داڵدەی تاوانباران و ژن كوژان دەدەن

ڕێكخراوی ژنانی ئازای كوردستان-ڕژاك بەیاننامەیەكی ناڕەزایی لەدژی دەستدرێژی كردنە سەر كچێكی 8 ساڵان و ئازادكردنی تاوانباران و زیادبوونی كۆمەڵكوژی ژنان بڵاوكردەوەو ڕایگەیاند، لەئاست ئەو تاوانانەی بەرامبەر ژنان و منداڵان دەكرێت بێدەنگ نابن.


ئەمڕۆ لەشاری سلێمانی، ڕژاك بەیاننامەیەكی ناڕەزایی بڵاوكردەوە لەدژی ئەو دەستدرێژی و تاوانانەی بەرامبەر منداڵان و ژنان دەكرێن و تاوانبارانیش ئازادەكرێن و ڕایگەیاند، باشوری كوردستان بەخاك و خەڵك و پیرۆزییەكانییەوە ڕۆژانە ڕووبەڕووی دەستدرێژی دەبێتەوە و حکومەتی هەرێمی كوردستان بەهەموو شێوەیەك باشوری كوردستانی ڕادەستی داگیركەرانی كوردستان كردووە، ئەنجامدانی ئەم كارەساتانە زۆر بەمەبەست و بە بەرنامە بەڕێوە دەچێـت، تەواوی ئەم تاوانانە حوكمەت و هێزی دەسەڵاتداری لەپشتەوەیە".


لەبەشێكی تری بەیاننامەكەدا، ڕەژاك تیشكی خستووەتە سەر داگیركارییەكانی دەوڵەتی تورك و ڕایگەیاندووە: ماوەی 27 ڕۆژە هێرشێكی دژواری دەوڵەتی توركیای  داگیركەر لەسەر باشوری كوردستان بەڕێوە دەچێت كە داگیركاری كەركوك و برادۆست و هەموو باشوری كوردستانی كردۆتە ئامانج، هەموو رۆژێك بە تۆپ و تەیارە خەڵكی گوندنشینان تۆپ باران دەكات و بەپیلانی گڵاو دەغڵ و كشتوكاڵی جوتیاران لە شاری كەركوك دەسوتێنێت، ئاشكرایە وابەستەبوونی دەسەڵاتدارانی باشوری كوردستان  بەدەوڵەتانی داگیركەری كوردستانەوە بەتایبەتی تەواو تەسلیم بوونیان بەدەوڵەتی داگیركەری توركیا، بۆتە هۆكاری قوڵبونەوەی گەندەڵی و نادیموكراتی و زهنیەتی پارچەگەری و زیادبوونی هەژاری و تێكچوونی باری ژیان و دەرونی كۆمەڵگا و كۆچی لاوان بۆ دەرەوەی وڵات و  ئەنجامدانی كۆمەڵكوژی ژنان .

جەختیش دەکاتەوە، کە تەواوی كێشەكانی باشوری كوردستان سەرچاوە سەرەكییەكەی  گرێدانی تەواوەتی  هێزی دەسەڵاتدارانە  بەدەوڵەتانی داگیركەری كوردستانەوە و دەڵێت: بە زیادکردنی دیاردەی دەستدرێژییكردنە سەر منداڵی مێنە و ئازادكردنی تاوانباران، کە بەتەواوەتی ئەنجامدانی كۆمەڵكوژیی منداڵان و ژنان و هەموو تاكەكانی كۆمەڵگایە، ئامانجیان دروست كردنی ترس و نەهێشتنی متمانەیە لەنێوان مرۆڤەكاندا و قوڵكردنەوەی زهنیەتی ڕەگەزگەرایی و مرۆڤەكان كردنە درندەی یەكتریە.

ڕژاک لە بەیاننامەکەیدا دەشڵێت: كوشتن و خۆسوتاندنی ژنان گەیشتووەتە ئاستێك كە كۆمەڵگاكەمان بۆنی خوێنی لێدێت. دەبێت بەزووترین كاتدا  هەڵوێست وەربگرین، كاتێك سەیری ڕووداوەكانی ئەم دواییەش دەكەین هیچ ویژدانێك ناتوانێت بێ دەنگ بێت.


د.ح