ڕژاک: یەکگرتن کۆتایی بە ئەنفال دێنێت

ڕژاک، قوربانیانی ئەنفال بەبیر دێنێتەوە و پێیوایە ئەنفال هێشتا بەردەوامە، بۆ کۆتاییپێهێنانیشی یەکگرتنی کورد و تێکۆشانی ژنان بە پێویست دەزانێت.


سبەینێ ساڵیادی تاوانی ئەنفالی باشوری کوردستانە و ئەمڕۆش ڕێکخراوی ژنانی ئازادی کوردستان-ڕژاک، بەو بۆنەیەوە ڕاگەیەندراوێکی بڵاوکردەوە.

لە ڕاگەیەندراوەکەدا، قوربانیانی تاوانی ئەنفال بەبیرهێندراوەتەوە و ئەنفالچییەکان شەرمەزار کراون، نیگەرانییش نیشانداروە لەوەی، کە ناوچە ئەنفالکراوەکان و بەتایبەت گەرمیان، وەک پێویست ئاوڕیان لێنەدراوەتەوە و ئەنفالچییەکانیش دادگایی نەکراون.

ئاماژە بەوەش کراوە، کە "ژن قوربانیی سەرەکی بووە لەو ئەنفالەدا و هاوشێوەی شەنگال کچانی کورد کڕین و فرۆشتنیان پێوە کراوە، بۆیە پێویستە تێکۆشان و بەرگریی خۆمان پەرە پێ بدەین تا ئەنفال، کیمیاباران و شەنگال دووبارەنەبێتەوە و پێویستە یەکڕیزیی گه‌لی كورد به‌ گشتیی و ژنانی كورد به‌تایبه‌تی ببنە چارەسەریی و هیوا بۆتەواوی خەڵکی باشور و گەرمیانیەکان بەتایبەت، هه‌تا ئێمه‌ وه‌كو ژنان یه‌كگرتوو نه‌بین، ئه‌قڵیه‌تی ئه‌نفال و كیمیاباران كۆتایی پێنایه‌ت و ژنان به‌رده‌وام له‌م جۆره‌ كاره‌ساتانه‌ پارێزراو نابن".

باس لەوەش کراوە، کە ئەمڕۆ لە عەفرین ئەنفالی گەلی کورد بەردەوامە و دووژمن چوار پارچەی کوردستان وەک یەک تەماشا دەکات، بە پێویستیشی دەزانێت 'گەلی کورد یەکبگرن و به‌ هاوپشتیی یه‌كتر بتوانین تاوانباران بده‌نه‌ به‌ر دادگای مێژوو و دادگایی‌ بكرێن و ژنان-یش بە یەکگرتن و تێکۆشان پێشەنگایەتیی بکەن و کۆتایی بە ئەنفال و داگیرکاریی بهێنن'.

 

ش.ف