ژمارەیەك هەڵسوڕاوی گۆڕان دەستیان لە پۆستە حزبیەكانیان كێشایەوە

لەشارۆچكەی خورماتوو ژمارەیەك هەڵسوڕاوی بزوتنەوەی گۆڕان دەستلەكاركێشانەوەیان لە پۆستە حزبییەكانی ئەو بزوتنەوەیە ڕاگەیاند، بەهۆكاری پشتگوێ‌ خستنی ناوچە دابڕێنراوەكان لەلایەن بزوتنەوەی گۆڕانەوە.


ئەمڕۆ لە شارۆچكەی خورماتووی سەر بە پارێزگای سەلاحەدین،15 هەڵسوڕاوی بزوتنەوەی گۆڕان، لەئاستی مەكۆی خورماتوودا بەدەركردنی بەیاننامەیەك وازهێنانیان لەپۆستەكانیان ڕاگەیاند، كە بریتین لە بەرپرسی بازنەو دەستەی ئەنجومەنی مەكۆی خورماتوو و ڕایەڵەی مامۆستایان و خوێندكاران و كاسبكاران و وەرزشكاران و بەرپرسی پەیجوری و كاندید بۆ ئەنجومەنی نوێنەرانی عێراق.


لەبەیاننامەكەیاندا، كە وێنەیەكی بۆ ڕۆژنیوز نێردراوە، هەڵسوڕاوە‌ دەستلەكاركێشاوەكان ڕایانگەیاندووە، ئێمە وەك ژمارەیەك هەڵسوڕاوی مەكۆی خورماتووی بزوتنەوەی گۆڕان، كە لە سەرەتای دامەزراندنی بزوتنەوەكەوە پەیوەندیمانكردووە و ژمارەمان (15) هەڵسوڕاوە و پێكدێن لە ئەندامی دەستە و ئەنجومەنی ڕایەڵە و بازنەكان، بڕیاری  دەست لەكاركێشانەوەی خۆمان لە پۆستەكانی مەكۆی خورماتوو ڕادەگەیەنین لەبەر چەند هۆكارێك.


لەبەیاننامەكەدا ئەو هۆكارانەی خراونەتەڕوو بریتین لە(بێ هەڵویستی بزوتنەوەی گۆڕان بەرامبەر بە ناوچە دابڕێنراوەكان، سەردان نەكردنی بەرپرسە باڵاكانی بزوتنەوەی گۆڕان بۆ خورماتوو و بێهەڵویستیان دوای ڕووداوەكانی 16ی ئۆكتۆبەر،جێبەجێنەكردنی داوای هاوڵاتیانی خورماتوو لە لایەن سەركردایەتی بزوتنەوەی گۆڕانەوە، دوای ئەوەی گەیشتوەتە دەستیان.


لەبەشێكی تری بەیاننامەكەدا ئەو هەڵسوڕاوانە بەلاڕێدابردنی بزوتنەوەی گۆڕان لەسەر ڕێبازی نەوشیروان موستەفا، بەهۆكارێكی تری وازهێنان لەپۆستەكانیان باسكردووە.

 

د.ح