ژنانی باشوری کوردستان سه‌ردانی له‌یلا گوڤه‌ن-یان کرد

شاندێکی ژنانی باشوری کوردستان سه‌ردانی له‌یلا گوڤه‌نیان کرد له‌ شاری ئامه‌د و ئاماژەیان بەوە کرد، پێویسته‌ ده‌رباره‌ی داواکاریی ئه‌و که‌سانه‌ی دژبه‌ گۆشه‌گیریی مانیان گرتووه‌ هه‌نگاوێک بنرێت.


شاندێکی ژنانی باشوری کوردستان که‌ له‌ ١١ ژن پێکهاتوون، ئەمڕۆ سه‌ردانی لەیلا گوڤەن، هاوسه‌رۆکی کۆنگره‌ی کۆمه‌ڵگه‌ی دیموکراتی-که‌جه‌ده‌-یان کرد لە ئامەد، که‌ ١٧٠ ڕۆژه‌ دژبه‌ گۆشه‌گیریی سه‌ر عه‌بدوڵا ئۆجالان له‌ مانگرتندایه‌.

له‌گه‌ڵ شانده‌که‌ هه‌ریه‌که‌ له‌ په‌رله‌مانتارانی پارتیی دیموکراتیی گه‌لان -هه‌ده‌په‌ سالیحه‌ ئایده‌نیز و فه‌له‌کناس ئووجا و چالاکانی بزووتنه‌وه‌ی ژنانی ئازاد-TJA سه‌ردانی گوڤه‌نیان کرد، ژنانی باشور له‌ میانه‌ی سه‌ردانه‌که‌یاندا تابلۆیه‌کیان پێشکه‌شی له‌یلا گوڤه‌ن کرد، کە وێنه‌ی گوڤه‌نی له‌سه‌ر بوو.

دوای سه‌ردانه‌که‌، شانده‌که‌ له‌ به‌رده‌م ماڵی له‌یلا گوڤه‌ن کۆنگرەیەکی ڕۆژنامەنووسییان ئەنجامدا، بانوو هه‌ڵه‌بجه‌یی لە کۆنگرەکەدا وتی: مانگرتن له‌ خواردن میراتێکه‌ که‌ له‌ زیندانه‌کانه‌وه‌ هاتووه‌، له‌یلا گوڤه‌ن له‌پێناو داواکارییه‌ک ده‌ستی به‌ مانگرتن کردووه‌، پێویسته‌ ده‌رباره‌ی دواکاریی ئه‌و که‌سانه‌ی دژبه‌ گۆشه‌گیریی سه‌ر ڕێبه‌ر ئاپۆ مانیان گرتووه‌، هه‌نگاوێک بنرێت.

شاندی ژنانی باشوری کوردستان، کە لە ژنانی شار و شارۆچکەکانی باشوری کوردستان پێکهاتوون، دواتر سه‌ردانی په‌رله‌مانتارانی مانگرتووی هه‌ده‌په‌یان کرد له‌ ناوه‌ندی هه‌ده‌په‌ هەر لە شاری ئامەدی باکوری کوردستان.

لە سەردانی پەرلەمانتارانی هەدەپەدا ویژدان نورەدین، ئەندامی شاندی ژنانی باشور وتی: ئێمە بۆ پشتگیریی لەیلا گوڤەن هاتینە ئێرە، لەیلا هەم دایکە و هەمیش ژنێکی بەهێزە، هەروەها ئێوە لە هەڵبژاردنی شارەوانییەکاندا سەرکەوتن، ئەو سەرکەوتنە پیرۆز دەکەین، ئێمە جارێکی دیکە سەرنج ڕادەکێشینە سەر یەکێتی نەتەوەیی و پێویستە یەکبگرین.

دواتر پەروین بوڵدان، هاوسەرۆکی گشتی هەدەپە وتی: سەردانی ئێوە بۆ ئامەد زۆر گرینگە و هێز دەداتە ئێمە، کورد لە هەر کوێ بن چارەنوسیان یەکە، ئێمە ئێستا ڕووبەڕووی سیاسەتێک بوینەتەوە کە دەیانەوێت کورد لەناوبەرن،بەرخۆدانی لەیلا گوڤەنیش بۆ ئازادییە، هەتا گۆشەگیریی کۆتایی نەیەت ئێمە ناتوانین باسی ئاشتییەکی هەمیشەیی بکەین.

بوڵدان ئەوەشی وت: ئێمە هەتا کۆتایی بۆ ئاشتی و ئازادیی تێدەکۆشین.

دوای ئەوە شاندەکە سەردانی ژووری کۆنفرانسەکانی وەدات ئایدن-یان کرد، پاشان سەردانی ناوەندی سەرەکی تەڤگەری ژنانی ئازادیان کرد.


ک.ک