ژنانی باشور شانازیی به‌ ژنە شەڕڤانەکانى کۆبانێ‌-وە ده‌که‌ن

ژنانی باشوری كوردستان ڕۆژی جیهانیی كۆبانێ پیرۆز ده‌که‌ن، ده‌ڵێن، کە ئەو یادە ڕۆژی سه‌رکه‌وتنی شەڕڤانانى ژنی كۆبانێ-یه‌ و شانازیان پێوە دەکەن، سەركەوتنی كۆبانێ-ش بە سەركەوتنی ئەزموونی یەكگرتووی كورد پێناسە دەکەن.


ڕۆژی ١ی نۆڤەمبەر وەکو ڕۆژی جیهانیی کۆبانێ دیاریکراوە، ڕۆژی ١٣ی نۆڤەمبەری ساڵی ٢٠١٤ چەتەکانی داعش بەهاوکاریی دەوڵەتی تورک هێرشیان کردە سەر کانتۆنی کۆبانێ-ی ڕۆژئاوای کوردستان، لە بەرامبەردا شەڕڤانانی یەپەژە و یەپەگە بەرخۆدانی مێژووییان ئەنجامدا، ژنانیش له‌و به‌رخۆدانه‌دا ڕۆڵی به‌رچاویان هه‌بوو، ئەو بەرگرییە جیهانی ناچاركرد ببنە بەشێك لە بەرگریی مێژویی لە كۆبانێ و ١ی نۆڤەمبەر كرایە ڕۆژی جیهانیی کۆبانێ.

به‌شێک له‌ ژنانی شاری سلێمانی لە باشوری كوردستان، سه‌باره‌ت به‌ ڕۆژی جیهانیی كۆبانێ و ڕۆڵی ژنان لەو بەرخۆدانە، بۆ ڕۆژنیوز دوان.

شێنێ محه‌مه‌د، خوێندكار لە زانكۆی سلێمانی، وتی:"ئه‌م ڕۆژه‌ ڕۆژی سه‌رکه‌وتنی شەڕڤانانى ژنە لە كۆبانێ‌،‌ پیرۆزبێت له‌ هه‌موو ژنانی گه‌لی کورد و ژنانی شەڕڤان، هیوادارین ئه‌م ڕۆژه ببێته‌ هۆی کۆده‌نگی و هه‌ماهه‌نگیی ته‌واوی نه‌ته‌وه‌ی كورد."

شێنێ پێشی وایە، ئه‌و وه‌رچه‌رخانه‌ گه‌وره‌یه‌ی ژنان لە كۆبانێ و ڕۆژئاوا کردیان، بۆ ژنانی کورد مێژوویه‌کی زۆر گرنگ بوو، ژنانی کورد ده‌توانن سوودێکی زۆر له ئەزموونی ژنانی كۆبانێ وه‌ربگرن.

شیرین حسێن مامۆستای زانكۆ، لەبارەی بەرخۆدانی كۆبانێ و ڕۆژی جیهانیی كۆبانێوە وتی:"هاوسۆزی خۆمان له‌گه‌ڵ هه‌رتاکێکی كۆبانێ به‌شده‌که‌ین، هه‌روه‌ها هاوخه‌می خۆمان بۆ عه‌فرین ده‌رده‌بڕین كە لەژێر داگیركاریدایە.

شیرین باسی له‌وه‌شکرد، که‌ ئازایه‌تی ژنانی شەڕڤان لە كۆبانێ له‌ڕووی ده‌روونیه‌وه‌ کاریگه‌ریی هەبووە و هه‌یه‌ له‌سه‌ر هه‌موو ژنانی کورد، هه‌موو ژنێکی کورد شانازی به‌ ژنانی شەڕڤانەوە ده‌کات.

لەسەر هەمان بابەت کاڵێ ئیسماعیل، فەرمانبەر وتی:"ئه‌م ڕۆژه‌ پیرۆزده‌که‌م  له‌ شەڕڤانانى ژن  و هیوادارم که‌ به‌رخۆدانی ژنانی شەڕڤان لە كۆبانێ  و عه‌فرین، ببێته‌ هۆی ئه‌وه‌ی بۆ لەمەودوا ژنانی کورد پشتگوێ نه‌خرێن، هه‌موو پێکه‌وه‌ کاربکه‌ین بۆ یه‌کگرتنی چوار پارچه‌ی کوردستان."

کاڵێ ئاماژه‌ی به‌وه‌شکرد، که‌ سه‌رکه‌وتنی كۆبانێ توانی ببێته‌ ئه‌زموونێک بۆ ئه‌وه‌ی هه‌موو کورد یه‌کگرتوو بێت، چونکه‌ به‌ یه‌کگرتوویی ده‌توانین سه‌رکه‌وتن به‌ده‌ستبهێنین.

د.ع