ژنانی هەڵەبجەو ڕێكخراوەكانی بواریی ژنان لە ٢٥ی نۆڤەمبەردا چەندین چالاكی تایبەت بەهۆشیاركردنەوە ژنان ئەنجامدەدەن و بڵاوكردنەوەی هاشتاگی لەجیاتی توندوتیژیی ڕێز و خوشەویستی بەكاربێنە لەتۆڕە كۆمەڵایەتیەكان یەكێكە لە چالاكییەكانیان.
٢٥ی نۆڤەمبەری هەموو ساڵێك لە سەرانسەری جیهان، دوو هەفتەی بەرەنگاربوونەوەی توندوتیژی دژ بە ژنان هۆشیاری كۆمەڵایەتی بەڕێوەدەچێت، لە هەرێمی كوردستانیش ساڵانە هەڵمەتەكە بە ئەنجامدانی چەندین چالاكی بەڕێوەدەچێت.
لەوبارەیەوە، شیلان سدیق، بەرپرسی ڕێكخراوی توانست لەهەڵەبجە بۆ ڕۆژنیوز وتی: وەك ساڵانی ڕابردوو هەڵمەتی هۆشیارییمان ئەنجامداوە لەناو ژناندا بۆ ئەوەی بەردەوام خۆیان ڕووبەڕووی توندوتیژییەكان ببنەوە، لەساڵی ڕابردووشەوە ٢٥ی نۆڤەمبەرمان ناو ناوە دوو هەفتەی بەختەوەریی خێزان.
دەشڵێت: وەك ڕێكخراوێكی ژنان لەگەڵ بەكارهێنانی ئەو دەستەواژەی دوو هەفتەی بەختەوەری خێزانی نییم، چونكە هەموو ڕۆژێك ژنان توندوتیژییان بەرامبەر دەكرێت، توندوتیژیی ئەوەش ناگەیەنێت تەنها لە ماڵدا پێتبكرێت، بەڵكو لەناو فەرمانگەكانی حكومەت و سێكتەرەكانی دیكە توندوتیژییەكان بەردەوام بەرامبەر ژنان دەكرێت.
شیلان، بەكارهێنانی هێڵی پەیوەندییكردنی نەناسراو بۆ ئەنجامدانی توندوتیژیی دژ بە ژنان، بە زەقترین دیاردەیی توندوتیژی لەئێستادا ناوبرد و وتی: لەگەڵ ئەوەشدا فەیسبوك هاككردن و ئیهانەكردنی ژنانە لەو ڕێگەیەوە ڕووی لەزیادكردنە و كەسیش لێپرسینەوەی لێناكات نازانرێت سەرچاوەكەیی كوێیە ئەوانە دەكرێت.
ڕێكخراوەكان داوا دەكەن، هەڵمەتە دوو هەفتەییەكە، تەنها بۆ هەڵمەتی بەرەنگاربونەوەی توندوتیژی دژ بەژنان نەبێت، بەڵكوو هۆشیاركردنەوەی كۆمەڵگا بێت بەرامبەر بەژنان توندوتیژییەكان بەكارنەهێنن.
لەنجە حسێن، ئەندامی ڕێكخراوی عادیلە خانم بۆ توێژینەوە و گەشەپێدان بە ڕۆژنیوزی وت: لە ٢٥ی نۆڤەمبەر بەهەموو جۆرێك كار لەسەر ئەوە دەكەین ژنان هۆشیار بكەینەوە، ڕێگریی بكەین لەتوندوتیژییەكان.
هەروەها وتيشى: هاشتاگێك لەتۆڕە كۆمەڵایەتیەكان بڵاودەكەینەوە، لەژێر ناوی هاشتاگی “لەجیاتی توندوتیژیی ڕێز و خۆشەویستیی بەكاربێنە”.
س.س
