ژنان: دەتوانین پێشەنگبین دژی داگیرکاریی هەروەک ژنانی ڕۆژئاوای کوردستان

ژنانی چالاكوان و مامۆستایانی زانكۆ، ئیدانەی هێرشەكانی دەوڵەتی تورك دەكەن،هەروەها باس لە گرنگی ڕۆڵی ژنان دەكەن لە وەدەرنانی دەوڵەتی تورك و بۆ ئەوەش ڕۆڵی ژنان لە ڕۆژئاوا دەکەنە نمونە، ژنان دەشڵێن: لە هەموو داگیرکارییەکاندا ژنان و منداڵان قوربانیی یەکەمن.


داگیركاریی و بۆردوومانەكانی دەوڵەتی تورك بۆ سەر باشوری كوردستان بەردەوامیی هەیە، تادێت هاوڵاتیان زیاتر هەست بە مەترسییەکانی دەکەن و داوای چوونە دەرەوەی تورکیا و وەستانی ئۆپەراسیۆنەکان دەکەن، لەوچوارچێوەیەدا، ژنانی چالاکوان بۆ ڕۆژنیوز دەدوێن.

كەژاڵ عەبدولقادر دەربارەی كاریگەرییەكانی داگیركاری و هێرشەكانی توركیا لەسەر لایەنە نەرێنییە كۆمەڵایەتییەکانی قسەی كرد و وتی: هەموو داگیركارییەك لە سەر مرۆڤایەتی دەبێتە هۆی تێكدانی شیرازەی كۆمەڵگا و لە هەرێمی كوردستانیشدا داگیركاری هەیە، توركیا بە قووڵایی ٣٠ كیلۆ مەتر لە ناو خاكی باشوردایە، ئەمەی توركیا دەیكات دەبێتە هۆی ئەوەی هەموو پایەكانی كۆمەڵگا زیانیان پێبگات، ئەوانەشی زیاتر دەبنە قوربانی هێرش و داگیركاریی و جەنگەكان ژنان و منداڵانن، وەك دەبینین توركیا كاتێك هێرش دەكات و بۆردوومان دەكات جیاوازی لەنێوان گەورە و بچوك یان ژن و پیاودا ناكات.

کەژاڵ دەڵێت: كاتێك ژن بەشی سەرەکیی كۆمەڵگا بێت، ئەوە پێشكەوتنی هەر كۆمەڵگایەك بەندە بە پێشكەوتنی ژنانەوە، چونكە پەروەردەكردنی نەوە جیاوازەكانی ناو كۆمەڵگا بە پلەی یەكەم ئەركەكەی دەكەوێتە سەر ژنان، هەر بۆیە زۆر گرنكە ژنان لەسەر بابەتێكی هەستیاری وەك داگیركاریی توركیا كۆك بین و هەڵوێستمان هەبێت لە دژی.

هەروەها ڕەیحان حەمە ئەدیب وتی: دەبینین لە پرسێكی هەستیاری وەك داگیركارییەكانی دەوڵەتی تورك بێدەنگییەكی مەترسیدارتر هەیە و كوردستان بەرەو ئاقارێكی خراپ دەبات، لەم پرسەدا بێدەنگی لەسودی  گەلی كورد نییە، لە  كاتێكدا توركیا هەر لەمێژەوە هەوڵێكی وای هەیە و تەنانەت خەریكە زۆر بەشی كوردستان بە كەركووكیشەوە دەگرێتەوە.

ڕەیحان ئاماژەی بە سەركەوتنی ڕۆژئاوای کوردستان و قارەمانییەتی ژنانی ئەوێ كرد و، وتی:"لەم كات و ساتەشدا ژنان پێویستە یەكگرتووبن و دەتوانن ڕۆڵیان هەبێت و گۆڕانكاری بخوڵقێنن، چونكە ئەوە هەر ژنان بوون لە ڕۆژئاوا بەرامبەر بە گەورەترین هێزی تیرۆریستی داعش شەڕیان كرد و توانیان كۆتایی بە داعش بهێنن".

هەروەها شنە عەلی مامۆستای زانكۆ ئیدانەی هێرشەكانی دەوڵەتی توركیای كرد و، وتیشی: دەبێت سنوورێك بۆ داگیركارییەكان دابنرێت و لە ڕووی یاساییەوە زۆرترین هەوڵبدرێت تا پێش بەو داگیركارییە بگیرێت، چونكە لەوەتەی مێژوو هەیە توركیا هەر هەوڵی داگیركاری دەدات، لە كاتێكدا ئێمەش دەمانەوێت وەك گەلانی دیكە بە ئاسوودەیی بژین.

شنە سەرنج دەخاتە سەر ڕۆڵی ژن و دەڵێت:" ئێمەی ژنان بە شۆڕشێكی مەدەنی و پێكەوەیی دەتوانین پێش بەو داگیركارییانە بگرین، تا چیتر دایكان و ژنان نەبنە قوربانی، چونكە بە دروستبوونی هەر شەڕێك دایكێك جەرگی دەسووتێت، خێزانێك هەڵدەوەشێتەوە و دەیان ڕووداوی ناخۆشی دیكە كە كاریگەری لە سەر ژنان هەیە".

س.ح