ژنە شۆڕشگێڕەکەی فەلەستین: لەیلا گوڤەن سیمبولی بەرخۆدانە

له‌یلا خالید، ئه‌ندامی مه‌کته‌بی سیاسی به‌ره‌ی ڕزگاریی گه‌لی فه‌له‌ستین، هۆشداری دایه‌ حکومه‌تی ئاکه‌په‌ و وتی: ئه‌گه‌ر شتێک به‌سه‌ر له‌یلا گوڤه‌ن بێت، ملیۆنان له‌یلا گوڤه‌ن دێنه‌ مه‌یدان. ئەوەشی وت، کە لەیلا گوڤەن بووەتە سیمبولی تێکۆشان و بەرخۆدان.


لەیلا خالد، ئەندامی مەکتەب سیاسی بەرەی ڕزگاری گەلی فەلەستین، بۆ سەردانی لەیلا گوڤەن هاوسەرۆکی کەجەدە، کە ١٥٩ ڕۆژە لە دژی گۆشەگیریی سەر عەبدوڵا ئۆجالان ڕێبەری پەکەکە دەستی داوەتە مانگرتن لەخوارد بە شێوەی بێسنوور، گەیشتە شاری ئامەدی باکوری کوردستان و چووە ماڵەکەی لەیلا گوڤەن.

ئەمڕۆ له‌یلا خالید دوای سه‌ردانه‌که‌ی له‌گه‌ڵ په‌رله‌مانتاری پارتیی دیموکراتیی گه‌لان (هه‌ده‌په‌) سالیحه‌ ئایده‌نیز و ئه‌ندامانی بزووتنه‌وه‌ی ژنانی ئازاد (ته‌ژه‌ئا) ئایشه‌ گۆکان و گولجیهان شیمشه‌ک، لێدوانێکی ڕۆژنامه‌وانیان دا.

له‌یلا خالید ڕایگه‌یاند: "له‌یلا گوڤه‌ن بۆ جێبه‌جێکردنی مافه‌ قانوونییه‌کانی ڕێبه‌ری گه‌لی کورد عه‌بدوڵا ئۆجالان له‌ مانگرتندایه‌، ئه‌و ژنێکی زۆر به‌هێزه‌ - شه‌ڕڤانێکی ئازادییه‌ - په‌رله‌مانتارێکه‌".

له‌یلا خالید وتی: من پێموایه‌ ڕێزدار ئۆجالان نایه‌وێت له‌به‌ر گۆشه‌گیریی که‌س ژیان له‌ده‌ست بدات، ئێمه‌ بۆ ژیان تێده‌کۆشین نه‌ک بۆ مردن.

له‌یلا خالید ئاماژه‌ی بۆ ئه‌وه‌ کرد که‌ له‌یلا گوڤه‌ن به‌رده‌وام ده‌بێت له‌ چالاکییه‌که‌ی و وتی: له‌یلا گوڤه‌ن بووه‌ته‌ سیمبولی تێکۆشین و به‌رخۆدان، به‌رده‌وام ده‌بێت له‌ به‌رخۆدان، په‌یامی ئه‌و له‌سه‌ر تۆڕه ‌کۆمه‌ڵایه‌تییه‌کان له‌ ئاستی جیهاندا بڵاوبوونه‌ته‌وه‌.

له‌یلا خالید، که‌ سیمبولێکی تێکۆشانی ڕزگاریی گه‌لی فه‌له‌ستینه‌، ده‌رباره‌ی گۆشه‌گیریی و مانگرتنه‌کان بانگی حکوومه‌تی تورک و ڕای گشتی کرد و وتی: "ئه‌م په‌یامه‌ی من بۆ ئه‌ردۆغانه‌، ئێوه‌ ئۆجالانتان ڕفاند و خستتانه‌ زیندان، من بانگی حکومه‌ت ده‌که‌م که‌ گوێ بداته‌ په‌یامی له‌یلا گوڤه‌ن، ده‌بێ په‌یوه‌ندیی ڕێزدار ئۆجالان له‌گه‌ڵ خانه‌واده‌، پارێزه‌ر، ڕاگه‌یاندن و ده‌ره‌وه‌ بکرێته‌وه‌، بانگی هه‌موو داکۆکیکارانی مافی مرۆڤ ده‌که‌م داواکارییه‌کانی له‌یلا گوڤه‌ن بگه‌یه‌ننه‌ حکومه‌ت، ئه‌گه‌ر شتێک به‌سه‌ر له‌یلا گوڤه‌ن بێت ملیۆنان له‌یلا گوڤه‌ن دێنه‌ مه‌یدان. له‌به‌رئه‌وه‌ ده‌بێ گوێ بده‌نه‌ داواکارییه‌کانی له‌یلا گوڤه‌ن، گۆشه‌گیری که‌ ئه‌وان ده‌یسه‌پێنن، گۆشه‌گیرییه‌ له‌سه‌ر شه‌ڕڤانانی ئازادیی، ڕێزدار ئۆجالان شه‌ڕڤانێکی ئازادییه‌".

 له‌یلا خالید و شاندی هاوڕێی دواتر سه‌ردانی په‌رله‌مانتارانی هه‌ده‌په‌ ده‌رسیم داغ، ته‌یب ته‌مه‌ل و موراد ساریساچ-یان کرد که‌ له‌ ٣ی ئاداره‌وه‌ له‌نێو بینای هه‌ده‌په‌ له‌ ئامه‌د ده‌ستیان به‌ مانگرتنی بێسنوور له‌ خواردن کردووه‌.


ک.ک