کەرکوک، ڕژاک داوا دەکات ڕێگا بە داگیرکاریی نەدرێت

لە شاری کەرکوک ڕێكخراوی ژنانی ئازادی كوردستان لەسەر دۆخی هەرێمی كوردستان و عێراق هەڵوێستیان دەربڕی و ئاماژەیان بەوەکرد، کە بەهۆی هەوڵە داگیرکارییەکانی دەوڵەتی تورکەوە ئاڵۆزیی لە هەرێمی کورستان و عێراق دروستبووە، داوایان لەهەموو لایەنکان کرد ڕێگا بە شەڕی براکوژیی و داگیرکاریی دەوڵەتی تورک نەدەن.


ئێوارەی ئەمڕۆ ڕێكخراوی ژنانی ئازادی كوردستان- ڕژاک لە بارەگای خۆی لە شاری كەركوك، لەسەر ڕەوەشی هەرێمی كوردستان عێراق بەیاننامەیەكیان خوێندەوە.

دلڤان ئەكرەم، ئەندامی دەستەی بەڕێوبەرایەتی ڕژاک، بەیاننامەکەی خوێندەوە کە تێیدا هاتبوو: ئەو ڕووداوانەی لەم دوایانەدا ڕوویان داوە بە گشتی لە عێراق و هەرێمی كوردستان بەتایبەتی لە شاری كەركوك لەلایەن دوژمنان و داگیركەران هەمووی گرێدراوی یەك سیستەم و عەقلیەتن و ئەویش دەسەڵات داریی و ڕەگەز گەرایی و سەرمایەدارییە، كە مەترسییەكی گەورەیە بۆ سەر میللەت و كۆمەڵگا و بووەتە هۆی درووست بوونی چەند كێشەیەكی ئابووری و كۆمەڵایەتی و سیاسی و فكریی و كلتووریی.

 لە درێژەی ڕاگەیەندراوەکەدا هاتوو: لەشكركێشی دەوڵەتی توركی فاشیستی بۆسەر دەڤەری زینی وەرتێ و داگیركردنی قەندیل، پرسی دورستبوونی شەڕی ناوخۆی هێناوەتە ئاراوە، بەمەش هێنانە دی خەونی ئیمپراتۆریەتی عوسمانی دێتەدی و بەناو(میساقی میللی) ئامانجیان داگیركردنی تەواوی خاكی باشوری كوردستانە.

هەر لە بەیاننامەکەدا باسی هێرشی فڕۆکەکەنای دەوڵەتی تورک کرابوو بۆسەر کامپی مەخمور و هاتبوو: بۆردوومان كردنی كامپی پەنابەرانی مەخمور و شەهید كردنی 3 ژن لەلاین فڕۆكە جەنگیەكانی توركیاوە بەزاندنی سەروەریی خاكی عێراقە، بەڵام حكومەت و پەرلەمانی عێراق هیچ هەڵوێستێكیان نەبوو لەسەری.

 لەسەر دۆخی كەركوك هێرشی چەتەکانی داعش هاتبوو: پەیدابوونی گرووپە تیرۆرستییەكانی داعش لە دەورووبەری كەركوك و شەهید كردنی پێشمەرگە و هاوڵاتیان و ڕفاندنیان و زیندوو بوونەوەی شانە نوستووەكانی ناو شاری كەركوك، بەڵگەی ئەوەیە سیستەمی سەرمایەداریی ڕەگەز گەرایی هەموو ڕووداوێك لەبەر ژەوەندی خۆیدا بەكار دەهێنێت‌ و ژنان دەبنە قوربانی سەرەكی.

لە بەیاننامەکەشدا ئاماژە بە زیادبوونی توندوتیژییەکان بەرامبەر بە ژنان کرابوو تێیدا هاتبوو: بەهۆی ڤایرۆسی كرۆناو كەرەنتینە كردنی خەڵك لەماڵەکانیاندا، توندوتیژی زیادی كردووە لەناو خێزانەكاندا، دەست دریژیی كردنە سەر ژنان و لاواز بوونی ئەخلاق و خۆكوشتنی ژنان و بێ‌ هیوایی ژنان دەرخەریی زاڵبوونی ئەقڵیەتی پیاو سالارییە.

 لە كۆتای بەیاننامەكەدا هاتبوو: وەك ژنانی شاری كەركوك داوا لەحیزبە كوردستانییەكان دەكەین هەڵوێستیان هەبێ بەرامبەر لەشكركێشی سەر زینی وەرتێ و هەموو ڕووداوەكانی دیکە، داوادەکەین حكومەت و پەرلەمانی هەرێم و عێراق بەپەلە هەڵویست نیشانبدەن و ڕێگا بە داگیركاریی و شەڕی برا كوژی نەدەن، بێدەنگی بشكێنن و چارەسەر بدۆزنەوە بۆ دابینكردنی ژیانێكی ئارام بۆ هاوڵاتیان.

د.ع