کەمپیەنی دژی داگیركەری و کوشتنی ژنان ڕاگەیەندرا

كەمپینی "دژی داگیركەری و ژن كوشتن، بێدەنگی بشكێنە"، لەلایەن ژنانی چالاکوان و سیاسی، ڕاگەیەندرا و بانگەوازی لە تەواوی ژنان دەکەن کە بێدەنگی بشکێنن و لە دژی کوشتنی ژنان و داگیرکاری هەڵویست نیشان بدەن.


پێشنیوەڕۆی ئەمڕۆ، لە دەزگای رۆشنبیری جەمال عیرفان، لە شاری سلێمانی لەلایەن ژنانی چالاکوان و سیاسییەوە لە دژی داگیرکارییەکان و بە قوربانی بوونی ژنان کەمپینێک لە ژێر دروشمی "دژی داگیرکاری و ژن کوشتن بێدەنگی بشکێنە"، کۆنگرەیەکی ڕۆژنامەنووسی سازکرا.

بێخاڵ نامیق، مامۆستا و ئەندامی کەمپینەکە لە کۆنگرەکەدا بەیاننامەی کەمپینەکەی خویندەوە و ڕایگەیاند: ئاشكرایە كێشەكانی كۆمەڵگاكەمان زۆر قوڵن، هەتا گەیشتونەتە ئاستی قەیران، وەك قەیرانی سیاسی و ئابووری و كۆمەڵایەتی و فكری، لە ئاستێكدایە كە كۆمەڵگای ڕووبەڕووی نائومێدی و بێ باوەڕبوون بە گۆڕانكاری و چارەسەری كردۆتەوە، ئێمەش پێمانوایە كێشەی سەرەكی بریتیە لە داگیركەری دەوڵەتان لەسەر خاكەكەمان و هێرش و تۆپباران و كۆچبەری و كۆمەڵكووژكردنی هاوڵاتیان و هەروەها كۆمەڵكوژکردنی ژنان.

لە درێژەی بەیاننامەکەدا هاتووە: "ئەم كێشانە تەواو گرێدراوی یەكترین و لەیەكتر دابڕاو نین و ئەگەر بەقووڵی تەماشای بكەین تەواوی دەسەڵاتدارە داگیركەرەكان بۆ ئەوەی تەمەنی داگیركارییان درێژبێت، كاریان لەسەر چەوسانەوەی تاكەكانی كۆمەڵگا كردووە، ئەویش لە رێگەی نەزانكردنی كۆمەڵگاوە ئەنجامی دەدەن، لە ئەنجامی هێرشی سەربازی و بۆردومانكردنی خاك و مرۆڤەکانیش ئەوەی باجی هەموو شێوازی داگیركارییەكان دەدات بەپلەی یەكەم ئێمەی ژنانین.

دەربارەی ئامانجی کەمپینەکەش ئەوە خرایەڕوو کە "دەمانەوێت بەخەڵكی ڕۆشنبیر و ڕاگەیاندنكار و هونەرمەند و نیشتمانپەروەر و خاوەن ویژدان و مرۆڤدۆست و ئازادیخواز و دیموكراتخوازەكان، بەتایبەتی بەهەموو ژنان بڵێین كە پرسی داگیركەری و پرسی ژنان دوو پرسی تەواو گرێدراوی یەکترن و ئەگەر داگیركەری نەمێنێت ئەوا كۆتایی بەژن كوشتن دێت و ئەگەر ژنكوشتن و هەموو جۆرە توندوتیژییەك لە كۆمەڵگا نەمێنێت، ئەوا ئیرادەی سیاسی و سەربەخۆ لە كوردستاندا دروست دەبێـت و كۆتایی بە داگیركەری دێت، بانگەوازیمان بۆ هەموو تاكێكە كە بەرپرسیاربێت و ئەم كەمپینە بە هی خۆیی بزانێت و بێدەنگییەكان بشكێنێت و كار بۆ چارەسەركردنی ئەم كێشانە بكات".

ئەرکەکانی کەمپینەکە لە داهاتوودا بریتیە لە:

- بەڕێوەبردنی هەڵمەتی هۆشیاركردنەوە لە دژی داگیركەری و كوشتنی ژنان لە هەموو گۆڕەپانەكانی ژیاندا.

- ئەنجامدانی چالاكی دیموكراتی و مەدەنییانەی ژنان لە پێناوی فشار خستنە سەر لایەنی پەیوەندیدار، بۆ ڕێگەگرتن لە داگیركەری و شكاندنی بێدەنگیەكان و  پێشخستنی ئاشتەوایی نێو ماڵی كورد.

- بەڕێوەبردنی هەڵمەتی هونەری و كلتووری و چالاكی دیموكراتییانە لە دژی هەموو دراما بیانییەكان و پێشخستنی كلتوور و هونەری رەسەنی كوردی و بەیەكەوە ژیانی گەلان و پێشخستنی هاوژیانی ئازاد.

- لە ڕێگەی هەڵمەتی یاسایی خۆبەخشانەوە بەدواداچوون بۆ دۆسییەكانی ژن كوشتن و سوتاندن و هەموو توندوتیژییەكان بکرێت.

ک.س