کەژار بە فەرمی پشتیوانی خۆی بۆ ناڕەزایەتیەکانی ئێران دوپاتکردەوە و ڕایگەیاند، بە بڕوابوونمان بە یەکگرتوویی هێزی گەلان و بە تایبەتی ژنان تێکۆشان بەگۆڕتر دەکەین، داواش لە چین و توێژە جیاوازەکانی ئێران دەکات بەرەیەکی یەکگرتوو پێکبهێنن.
دەستەی بەڕێوەبەری کۆمەڵگەی ژنانی ئازادی رۆژهەڵاتی کوردستان (کەژار) لەبارەی شۆڕشی ژن، ژیان، ئازادی خۆراگری خەڵک و لە سێدارەدانەکانی ئێران ڕاگەیاندراوێکی بڵاوکردەوە.
لە سەرەتای ڕاگەیەندراوەکەدا کەژار دەڵێت: شۆڕشی «ژن ژیان ئازادی» ماوەی زیاتر لە چوار مانگە بەردەوامی هەیە، ئەم شۆڕشە بە دونیای دەسەلمێنێت کە چەندە شۆڕشێکی خاوەن تایبەتمەندی بیردۆزیە، ئەوەندەش خاوەن تایبەتمەندی سیاسی، کۆمەڵایەتی، کەلتووری و فرە رەنگیە. ئەم شۆڕشە بە هەموو دونیای ڕاگەیاند کە لە گۆڕانکارییەکی بنەڕەتی و قوڵ دەگەڕێت. بە پێشانگایەتی ڕادیکاڵی ژنان، لاوان و هەموو چین و توێژەکانی کۆمەڵگا.
رەخنەی لە سیستمی حوکمڕانی ئێران گرتووە و دەڵێت “ڕژێمی وەلایەتی موتڵەقی فەقیە لە کارنامەی رەشی ٤٤ ساڵەی خۆیدا، بە دڕندانەترین شێواز ئەمەی لە سەر کۆمەڵگا و بەر لەویش لە سەر کەسایەتی ژن سەپاندوە . گەورەترین تایبەتمەندی ئەم شۆڕشە داخستنی هەموو ئەو درزە مەزهەبی، نەتەوەیی و زایەندیانە بوو کە دەوڵەت وەکو ئەهرۆمی فشار و گەرەنتی هەبوونی خۆی لە بەرامبەر کۆمەڵگا بە کاری دە‌هێنا. لە هەمان کات و لەبەرامبەری ئەوەش، گەورەترین درز لە نێوان دەوڵەت و کۆمەڵگا دروست بوو. کە ئەمەش دەتوانین وەکو دەستکەوتێکی گەورەی ئەم شۆڕشە لەبەرچاو بگرین”.
ئەوەشی ڕاگەیاندووە: شورشی ژن ژیان ئازادی بوو بە دەرگای دەربازبوون لە سیاسەتی دەوڵەت-نەتەوە، دەلاقەیەک بوو کە کۆمەڵگا جارێکی دیکە هێزی خۆی ببینێتەوە، ئەم دەروازەیە نە تەنیا لە رۆژهەڵاتی کوردستان و ئێران ، بەڵکو بوو بە ئاسۆیەک لە رۆژهەڵاتی ناوین دا.
دەستەی بەڕێوەبەری کۆمەڵگەی ژنانی ئازادی رۆژهەڵاتی کوردستان باسی لەوەسکردووە: گەلانی ئێران بە تایبەت، هێزە دینامیکەکانی شۆڕش پێویستە باش بزانن کە شۆرشی ژن ژیان ئازادی، شۆڕشێکی زییهنیە و هۆشیاریەکی زیهنی لە گەڵ خۆی هێنایە ئاراوە. بەم شۆڕشە پێویستە ژنان جارێکی دیکە بگەنەوە ئەو گۆڕەپانانەی کە بە ساڵانە لێیان زەوت کراوە.
کەژار ڕاشیگەیاندووە: ئەوەی کە دیارە و سەلمێندراوە، بارودۆخی کۆمەڵگا و بە تایبەتی ژنان لە ئێران و رۆژهەڵاتی کوردستان جارێکی دیکە ناگەڕێتەوە بۆ چوار مانگ لەمەو بەر و هەر چرکە بەرەو پێش ترهەنگاو هەڵئەگرن.
بەبیری هێناوەتەوە ئەوان وەک کۆمەڵگەی ژنانی ئازادی رۆژهەڵاتی کوردستان “هیچکات چاومان لە زوڵم و ستەمەکانی ڕژێمی وەلایەتی فەقیە نەگرتوە و ناگرین و بە خوێندنەوەی سیاسەتەکانی دەوڵەت-نەتەوە، کە بە سەر کۆمەڵگا و بە تایبەت ژنان ئەیسەپێنێت، ڕوومان لە بەرفراوان کردنی بەرەی دیموکراتیک کردووە”.
ئاسکرآسیکردووە “بە بڕوابوونمان بە یەکگرتوویی هێزی گەلان و بە تایبەتی ژنان تێکۆشان بەگۆڕتر دەکەین. لەم قۆناغە هەستیارە کە هەموومان دەستکەوتەکانی شۆڕشی ژن ژیان ئازادی دەبینین و هێزی لێ وەردەگرین، بانگمان لە هەموو چین و توێژەکانی کۆمەڵگا، لە نەتەوەکانی بەلووچ، کورد، عەرەب، ئازەری، فارس و تەواوی پێکهاتەکان، هەروەها ژنان، لاوان و بە تایبەتی دایکانی شەهیدان هەیە کە بە یەکڕیزی و یەکدەنگی زۆرتر لە پێکهێنانی کۆمەڵگای دیموکراتیک و ئازاد بەشدار بین”.
داوای ئەوەشی کردووە “هەموو وزەمان ببەخشین بە دروست کردنی بەرەی یەکگرتوو (خاوەن پیشەو بازاڕییەکان، مامۆستا، دکتۆر، پارێزەر، ماموستای ئایینی، هونەرمەند، وەرزشکارو…..) و بەم جۆرە بەرەو بونیادنانی کۆمەڵگایەک هەنگاو بنێین کە بتوانێ پشت بە هێزی جەوهەری خۆی ببەستێ و بڕوامان بەوە هەبێ هێڵی سێهەم کە هاوکات هێزی گەلان بۆ خۆیانە سەرکەوتووترین مۆدێلە لە پێکهێنانی سیاسەتی دیموکراتیک دا”.
ها-ع
