کۆنفرانسی نێودەوڵەتی ژنانی عێراق سەبارەت بە قڕکردنی ژنان و ژنانی ئێزدی وەک نموونە، لە شاری بەغدا بەردەوامە و تا ئێستا پێنج پانێل لە بارەی دۆخی ژنانەوە ئەنجامدراوە و بڕیارە ئەمڕۆ کۆتایی بەکارەکانی بهێنێت.
لە پانێلێکدا لەبارەی، بەرپرسیارێتی حکومەتی عێراق و ڕێکخراوە نێودەوڵەتییەکان چین؟ ماريۆن بوكر، ئەندامی ئەنجومەنی ژنانی ئەڵمانیا (DFR)، جێگری سەرۆکی هاوپەیمانی نێودەوڵەتی ژنان (IAW) ئاماژەی بەوەدا، پێویستە لە ئاستی نێودەوڵەتی و عێراقدا کار بکرێت تا کۆمەڵكوژی شەنگال بناسرێت و ئەو یاسایەی لە عێراقدا هەیە جێبەجێ بکرێت.
ئەو ژنە ئەڵمانیە وتیشی: پێشێلکردنی مافی ژنان بەردەوامە، ژنان دەبنە ئامانجی سیاسەتی جیهان بۆ ئەوە پێویستە ژنان یەکڕیز و یەکگرتوو بن، ئێمە لە ڕێکخراوەکان و دەزگاکانی مافی مرۆڤدا پێویستە کار بکەین تا ئایندەی ئێزدییەکان مسۆگەر بکەین لە شەنگال و خۆپاراستن پێشبخەین و کۆتایی بە کۆمەڵکوژی ژنان بهێنرێت لە شەنگال و هەموو جیهان.
هەر لەو پانێلەدا ڕێزان شێخ دلێر، ئەندامی پێشووی ئەنجومەنی نوێنەرانی عێراق لە وتەیەکدا باسی لە گرنگی بونی دادگای تایبەتمەند بە دۆسیەی کۆمەڵکوژی و دادگای تایبەت بە پرسی ژنان کرد وتیشی: بوونی ژنانی عێراق و کورد لەناو پارتە سیاسییەکان و بوارەکانی ژیاندا ئاستەنگ دەکرێت، جا ئەگەر ژنێکی ئێزدی بێت قورسترە.
لە بەردەوامی ئەو پانێلەدا کە چوارەمین پانێلی نێو کۆنفڕانسەکە بوو، لەیلا قاسم، ئەندامی نوسینگەی هەماهەنگی تاژێ بابەتێكی پێشکەشکرد باسی لە دۆخی ئێستای شەنگال کرد لە نێو ململانێ و کێشە و پیلانگێڕییەکاندا، چۆن ژنان ڕووبەڕووی پلانگێڕییەکان دەبنەوە و بوونەتە قەڵای بەرخۆدان و قەڵغانی پاراستنی شەنگال لە هێرشەکان.
لە پانێلێکی دیکەدا نەجیبە قەرەداغی، ڕۆژنامەنووس و ئەندامی ئەندامی ئەکادیمیای ژنۆلۆژی لەبارەی “پێشنیازی پرۆژەی عێراقی دیموکراتیک و ئازادی ژنان وەک دژەژاری جینۆساید و قڕکردنی ژنان” وتی: کۆمەڵکوژی ئێزدییەکان نمونەیەکی ئەزموون بەخشە لە سیستم و ناوەندەکانی حکومڕانی تێبگەین چۆن کۆمەڵگە بەڕێوەدەبەن، چۆن سەیری جیاوازی نەتەوەیی، ئاینی، کلتور و ناسنامەکانی دیکە دەکەنەوە.
قەرەداغی ڕونیکردەوە، کۆمەڵگەی ئێزدی و ژن بە تایبەتی، خاک و ژینگە و ئاینەکەی ڕووبەڕووی سێ جۆری قڕکردن بوونەتەوە و دەبنەوە، ئەوانیش قڕکردنیان وەک کۆمەڵگە لە خانەی جینۆساید، بەئامانجگرتنی ژنانی ئێزدی و قڕکردنیان کە دەکەوێتە خانەی فێمیساید، قڕکردنی ژینگەیی لە ئەنجامی ئەو هێرش و پەلامارانەی ڕۆژانە ڕووبەڕووی دەبنەوە لە خانەی ئیکۆساید.
لە ئیستادا کارەکانی کۆنفڕانسەکە بەردەوامە و بڕیارە دوای گفتوگۆکردنی ئەنجامنامەیەک بڵاو بکاتەوە و دواتر کۆتایی بەکارەکانی بهێنێت.
ها-غ
