محەمەد جبوری
بەهۆی دروستكردنی بەنداوەوە لەسەر ڕووباری دیجلە و فورات، هۆشداریی دەدرێت لە زیابوونی ڕێژەی بیابانبوونی عێراقی و پێشبینی دەكرێت، لە ٢٠ ساڵی داهاتوودا قەیرانی ئاو لە عێراق دروستببێت.
ڕێژەی وشكبوونی خاكی عێراق و بە بیابانبوونی عێراق لە زیادبووندایە و بەوتەی پسپۆڕانی بواری كەشوهەوا و ژینگە، هۆكارەكانی كەمی ڕێژەی بارانبارین و سەوزاریی و كەمبونەوەی ئاستی ئاوی دیجلە و فوراتە.
سادق عەتیە، پسپۆڕی کەشوهەوا بە ڕۆژنیوزی وت: ڕێژەی بیابانبوونی عێراق گەیشتووەتە نزیکەی ٧٠٪، کە لەوانەیە زیاد ببێت و عێراق لە ساڵی ٢٠٤٠ دا تووشی قەیرانی ئاو ببێت ق ڕووبارەکان بەرەو وشكبوون بڕۆن.
عەتییە داوایكرد، حكومەتی عێراق پلانی ستراتیژیی هەبێت بۆ چارەسەرکردنی قەیرانی وشکبوونی ڕووبار و دەریاچە و كەمبوونەوەی ڕێژەی بە بیابانبوون و وتیشی: ئەگەر پلانی نیشتیمانیی بۆ دارستانەکان دانەنرێت، ئەوا عێراق لە هاویندا دەبێتە ژینگەیەکی لماویی و گەرم.
بەپێی ئامارەکانی نەتەوە یەکگرتووەکان، عێراق ساڵانە نزیکەی ١٠٠ هەزار دۆنم زەوی كشتوكاڵیی لەدەستداوە، لە ئەنجامی ئەو گۆڕانکارییە کەشوهەواییەی، کە لە ئاستی جیهانیی و عێراقدا ڕووی داوە، هەروەها بەکارهێنانی زۆری خاک بەهۆی دووبارەکردنەوەی کشتوکاڵ و سیستمی ئاودێریی.
ئاستی ئاوی ڕووباری فورات، کە لە تورکیاوە سەرچاوە دەگرێت و دەڕژێتە عێراق و سوریا، کەمیکردووە و هۆشداریی دەدرێت، كە كەمبونەوەی ئاوی ڕووباری فورات مەترسییە لەسەر ژیانی سوریا و عێراقییەکان لەڕووی ئاوی خواردنەوە و ئاودێریی.
عەلی مەهدی، پسپۆری ستراتیجی دەڵێت: بەردەوامیی دروستکردنی بەنداو لەسەر ڕووبارەکانی دیجلە و فورات هەڕەشە لە بوونی عێراق دەکات، بابەتی بە بیابانبوون بووەتە کێشەیەکی ئاڵۆز و هەڵوێستی حکومەتیش ناڕوونە.
عەلی مەهدی، حكومەتی عێراقی لەو بوارەدا بە کەمتەرخەم زانی و وتی: حكومەتی عێراق كاردانەوەی نییە بۆ هاندانی ئیرادەی نێودەوڵەتیی بۆ دەستتێوەردان بۆ چارەسەرکردنی قەیرانەکان.
وتیشی: دەستدرێژیی دژی عێراق لەڕێگەی شەڕی ئاوەوە، پێویستی بە کاردانەوەیەکی جدیی حکومەت هەیە، کە لە ئاستی ئەو مەترسییەدا بێت، بەتایبەتی، کە یەکسانە بە دەستدرێژییە سەربازییەکانی دژی عێراق.
س.س